Пиналъёс понна йӧскалыккуспо лагерь ортчоз Ижкарын коньывуонэ

Россиын улӥсь калыкъёслэн лулчеберетэнызы тодматскон понна лагере пӧртэм кунъёсысь 50 делегатъёс вуозы.

«Лагерьлэн вань ужрадъёсыз йӧскалыккуспоесь. Ми нылпиосты йӧслыкъёсын тодматӥськом, соослэсь кунмуртлык шӧдонзэс кылдытӥськом, лулчеберетъя кусыпъёсты юнматӥськом», — шуиз «Вместе» ассоциацилэн ёзчиез Мария Царёва.

Лагерьын «йӧскалык лулчебертъёсъя нуналъёс» сямен радъяськоз. Котькуд нунал — со выль калык но солэн йӧскалык лулчеберетэныз, историеныз, улон-вылонэныз, сям-йылолъёсыныз тодматскон. Со нуналъёсы  калык сырысь тодонъёс басьтэм сяна, солэсь улон омырзэ шокчыны луонлык кылдэ. Дунне шоры мукет калыклэн синъёсыныз учкыса, кыӵе ке одӥг калык мукетызлэсь вылӥынгес шуыса малпанъёс капчиен бырозы. Та ужпумлы лагерьлэн вань улонэз сӥземын, пусъё радъясьёс.

Со сяна, пиналъёс йӧскалык кусыпъёсын герӟаськем шуг-секытъёс сярысь кенешозы. Озьы ик пӧртэм тренингъёс, мастер-классъёс, творчествоя ужъёс но ӵошен акциос радъяськозы.

Кунгож сьӧрысь куноосты пумиталозы туала удмурт крезьгурен — «Эктоника» дискотекаен. Смена «Эшьяськон Тылскем» («Костёр Дружбы») ужрадэн йылпумъяськоз.

Ватсалом, йӧскалыккуспо элькун лагерь сменаез «Вместе» ассоциация 10 арлэсь кема радъя ни. Сомында ар ӵоже смена кӧня ке пол нимзэ вошъяз: «Вамыштӥськом ӵошен» («Шагаем вместе»), «Лэсьтом ӵошен» («Сделаем вместе»). Ужрадлэн ужпумез гинэ уг воштӥськы — йӧскалык кусыпъёсты эзьятон (гармонизация), ас понназы улонэ пырисьёслэсь кунмуртлыко кылкутонзэс кылдытон.

http://udmurt.media/udm/news/obshchestvo/25264/