Россиысь финн-угор калыкъёслэн 6-тӥ ӧтчамзы усьтӥськиз Сыктывкарын 27-тӥ куарусёнэ

Куинь нунал ӵоже соос Россиысь финн-угор калыкъёслэн ассоциацизылэн 4 ар ужамезлы йылпумъянъёс лэсьтозы, ог-огенызы асьсэ улосвылын йӧскалык лулчеберетэз, тодос но дышетон удысэз азинтонъя ужен люкиськозы. Удмуртиысь 34 адямием делегация лыктэмъёс пӧлысь тужгес бадӟымез.

«Нырысь ик, таӵе ужрадъёсын котькуд лыктӥсь адями, делегат-а, наблюдатель-а шуом, ог-огзылэсь кызьы ке но бурдъясько, мылкыд басьто.

Соос учко, мар лэсьтӥське мукет улосвылъёсын, кытын асьмеос азинскиськом, кытын асьмеос бере кылиськом. Котьку но сыӵе мукетгес мылкыд кылдэ, бертыса мае ке эшшо лэсьтэм потэ,

— шуэ «Удмурт Кенеш» огазеяськонлэн кивалтӥсез Татьяна Ишматова.

Татьяна Ишматова пусйиз, финн-угор кылыкъёслэн ужрадъёсазы удмуртъёс азинскисьёс пӧлысь одӥгъёсыз шуыса. Ӧтчамлэн программаезъя учкыса, асьмелэн котькуд секциын вань доклад лыдӟисьёсмы.

Со вера удмурт калык йӧскалык политикаен но удмуртлыкен герӟаськем юанъёсын бере уг кыльы шуыса.

«Таяз арын бадӟым саклык висъяны турттӥм ёрос кивалтӥсьёсмылы, кенешчиосмылы. Соос но бугыръясько, мар ке но лэсьто асьсэ доразы. Палэнэ потыса эшшо но мукет малпанъёс лыкто.

Мон малпасько, татысь бертыса соос выль мылкыдын ужаны кутскозы, быгатозы мукет адямиосты но бордазы карыны, золгес кыскыны»,

— шуэ Татьяна Ишматова.

http://udmurt.media/udm/news/obshchestvo/25021/

Комилэн шоркараз та нуналъёсы ик Финн-угор калыкъёслэн устолыксыя «Туйвёж» фестивальзы, чеберлыкъя «Мисс студенчества Финно-Угрии — 2017» калыккуспо вожвылъяськон, Коми калыкъёслэн мифъёссыя «Волшебная сказка Пармы» йӧ вылын шоу но мукет ужрадъёс ортчозы.