Бесерманъёс доры вуылӥзы Мускоысь тодосчиос

14 ар пала ини Москваысь делегация удмурт шаере бесерман кыл сярысь материал бичан бордын тырше. Туэ трос аръёс ӵоже ужамзылэн емышез потӥз — бесерман кыллюкам. Туннэ со Шамарданын улӥсъёс кие вуиз ини. Со асьмелы дышем кыллюкамъёслэсь пыр-поч берыктэменыз висъяське.

Отын нимкылъёс, прилагательной но наречиос гинэ. Бесермян кыл ӟуче трос кылъёсын яке быдэс предложениен берыктэмын. Нимысьтыз ёзэтъёсын висъямын сиён-юон, гурт удыс но мукет.

Экспедицилэн ужезлы но емышъёсызлы шумпото асьме тодосчиос, кылэн тунсыкъяськисъёс.

«Арлыдоос кошко, вашкалазэ сьӧразы нуо, — шуэ этнограф Елена Попова. — Соин валче кошко бесерман кыл но йылолъёс. Бадӟым уж лэсьтэмын бесерманъёс, этнографъёс, Удмуртиысь тодосчиос понна.  Москваысь тодосчиос ведь кунгож сьӧрын потӥсь пӧртэм журналъёсын потто татын лэсьтэм статьяоссэс».

Тодосчиос ӝоген выль уж борды кутскозы. Бесерман выжыкылъёсын но мадёсъёсын книга дасялозы. Бичет вуоно арын дась луыны кулэ. Нимыз но тодмо ини – «Бесерманъёс верало».

http://www.myudm.ru/