“Эруын” вормизы Шаркан ёросысь балтачъёс

“Эру” шулдыръяськон Мувыр Вишурын 3-тӥзэ ортче ни — котьку сямен пумитамзэс вылӥ дунъяны луэ.

— Кыӵе гинэ удысэз уд басьты, Шаркан ёрос нырысетӥ интыын, мар борды гинэ уд басьтӥськиське, ваньмыз кияды ӝуа, — ужрадэз усьтыку вераз “Удмурт Кенеш” огазеяськонлэн тӧроез Татьяна Ишматова. — Трос аръёс талэсь азьло ми но пыриськылӥмы та шулдыръяськонэ. Али та сям-йылолэз азинто, ужрадэз радъяло адӟем карымон егитъёс. Озьыен, асьме историмы, культурмы ноку уз вуны.

Клуб азьын крезьгур ӵукнаысен ик чузъяське ни, пумен-пумен вуо егитъёс но — тани Шаркан ёросысь Кыкваысь, тани Эгра ёросысь Кабачигуртысь, нош Татарстанысь воксё кык команда лыктэм — Агрыз но Балтач ёросъёсысь. Пӧлазы вожвылъяськыны мылкыд каризы фин туристъёс но — соос Мувыр Вишуре арнялы удмурт улонэн тодматскыны, шутэтскыны лыктӥллям. Егитъёс пыр-поч дасяськиллям, со адӟиськиз калыкез асэнызы тодматыку. Озьы кутскиз командаос куспын вожвылъяськон: пӧртэм заданиосын сюресэз ортчон,  быгатонлыксэс возьматон. Тани, ракета выллем, азьысьтызы адямиосты адӟытэк, сётэм ужъёсты быдэстыса, соос одӥг интыысь мукет азе лобо. Озьы “Эру” шулдыръяськонын тужгес етӥзъёсыз, амалоосыз, быгатӥсьёсыз луизы Шаркан ёросысь Нижние Кивары гуртысь егитъёс, соослэсь кыдёке ӧз кыле мувыр вишуръёс, куинетӥе кылизы кабачигуртъёс.

Озьы ик быдэ вуэмзэс возьматӥзы “Кык дыдыкъёс” ӵошатсконэ пыриськемъёс но. Пиос пу вандылӥзы-пильылӥзы, нылъёс ву вайизы, черсӥськизы но мукет. Ваньзэ шаплыгес но ӟеч лэсьтӥзы Вавож ёросысь Игорь Иванов но Шаркан ёросысь Кыкваысь  Светлана Ерёмина. Вераны кулэ, паръёс кылдо жребий куштыса, озьы одӥз командаысь ныл паре сюре мукет командаысь пиен.

Вожвылъяськонэн вожвылъяськон, но егитъёс татчы ог-огенызы тодматскыны, эшъяськыны лыктӥзы. Сое пусйиз “Шунды” огазеяськонлэн тӧроез Алина Чернова но. Озьы вань командаос ӝытлы пумит дискотекаын эктӥзы.