Удмурт кун университетын йылпумъяськизы удмурт кылъя курсъёс

— Та курсъёсты ми радъяськомы 17-тӥзэ, — вера Удмурт филологияя, финно-угроведениея но журналистикая институтысь журналистикая кафедраен кивалтӥсь, курсъёсты радъясь Дмитрий Ефремов. — Удмурт кылъя занятиос сяна, культурамыя лекциос ортчо. Дышетӥсьёсмы соосты англи кылын лыдӟо, куноосмы ваньзэ мед валалозы шуыса.

Нош удмурт кылмес умойгес но ӝоггес мед дышетозы шуыса, шутэтскон нуналъёсы куноос удмурт студентъёс доры ветло. Отын ини матысьгес тодматско гуртысь улон-вылонэн, адямиосын.

— Дышетскисьёс понна малпамын тунсыко программа но: соосын ми вуылӥмы ни Ижысь музее, озьы ик П. Чайковскийлэн но «Лудорвай» музейёсы, пӧртэм мастер-классъёсы но лекциосы, — вера куратор Илона Воронцова.

Курсъёс кутскыку, Илона кунгож сьӧрысь куноосын англи кылын вераськем, табере удмурт сямен но огкыл шедьтыны луэ ни, пе. 2 арня куспын валаны но вераськыны кутскиллям!

— Мон тужгес пайми американецлы, — азьланьтэ Илона. — Воксё мукет континентысь адями тунсыкъяське вордскем кылыным! Со али Финляндиын дышетске, пе, урал кылъёсын тодматске. Озьы тодэм удмурт кыл сярысь но сое дышетыны малпам.

Нош Венгриысь 47 аресъем Янэк Чаньи фермер удмурт кылъя курсъёсы кыкетӥзэ лыктэм ини.

— Нырысьсэ вуылӥ 3 ар талэсь азьло, — вера Янэк Чаньи. — Тросэз понна Россия — со Москва но Санкт-Петербург, нош та кун туж бадӟым ук! Кыӵе но калыкез татын ӧвӧл! Удмурт кыл мыным тунсыко потӥз Сэгед университетысь удмурт кылъя дышетӥсен — Катя Сунцоваен — тодматскеме бере.

Курсъёслэн берпуметӥ арняяз Кияса ёросысь Вуж Салья гуртын вань мылкыд карисьёс понна «Яратоно удмурт кыл» лагерь ужаз. Кунгож сьӧрысь куноос но отчы вуылӥзы.