Кукморын удмуртъёслэн вашкала гуръёссыя «Чакара» фестиваль ортчиз
Солэн кылъёсызъя, «Чакара» фестивале 13 улосвылъёсысь удмуртъёслэн фольклор коллективъёс вуизы, сцена вылэ потӥсьёс гинэ 750 кузя вал.
«750 адями вал сцена вылэ потыса кырӟась-эктӥсь артистъёсмы. Тямыс час мынӥз фестивальмы. Нуналскын 20 минут вал вис. Одӥг улосвылысь 6–7 коллектив лыктэмын, котькуд гуртлэн пӧртэм сюанъёссы но, корка пыронъёссы но. Кӧня ке коллектив корка пырон адӟытӥз, котькудӥз туж тунсыко, ас сяменызы адӟыто соос, ас сяменызы кырӟало», — Флюра Чибышева.
Куазь зоремен сэрен ужрад школаын кутскиз. 450 интылы гинэ чаклам залэ вань мылкыд карисьёс ӧз тэре.
«Туж трос калык вал, пырыны ӧз быгатэ. Но соос паймыса кылиллямтэ, ваньзы соос эктыны-кырӟаны кутскиллям школалэн нырысетӥ этажысь фойеын. Отын аспӧртэм фестиваль, озьы ик кыкетӥ этажын, кытын вал зал. Но куазь шулдыр луыны кутскем бере поттӥзы кыре. Тӧро куке адӟиз, калык туж трос шуыса, туж тросэз пырыны уг быгато, уг сюро со залэ, соку ик сётӥз команда — поттыны ваньзэс ураме», — вераз камсьӧр удмуртъёслэн азьветлӥсьсы.
Фестиваль быдэс нунал кыстӥськиз ке но, Флюра Чибышевалэн верамезъя, учкисьёс кошкыны ӧз дыртэ. Азьлогес вырӟизы кыдёкысь лыктэмъёс гинэ, кинлэн кузь сюресэз бертоно вал.
«Калыклы сыӵе праздникъёс туж кулэ, лэся. Зор шоры учкытэк калыклэн лыктэмезлы мон пайми. Но бигер удмуртъёслэн кужымзы туж бадӟым. Туж визьмоесь, туж быгатӥсесь, соослы туж дурбасьто кивалтӥсьёс, туж ярато соосыз — бигер удмуртъёсыз. Паймемын мон, кызьы кивалтӥсьёс гажало удмурт калыкез отысь шуыса. Соос зэмзэ, но возьыны быгато асьсэзыз, кылзэс вераны быгато, кылзэс верам бере ужзэс но лэсьтыны быгато. Соос таӵе принципен уло: «Сиськыны быгатӥськод-а? Озьыен, ужаны но быгатӥськод». Сыӵе девиззы, лэся», — бигерысь удмуртъёслы синмаськемзэ вераз Флюра Чибышева.
Вераны кулэ, фестиваль азьын, 7-тӥ пӧсьтолэзе, улосвылъёсысь фольклор коллективъёс Кукомр ёросысь удмурт гуртъёсысь школаосы концертъёсын потазы на.
Флюра Чибышевалэн верамезъя, вуоно арын укмысэтӥез фестиваль Киров улосвылын ортчоз, но муниципал кылдытэт али бырйымтэ на.
ВАТСАН
Тодэ вайытом, «Камсьӧр удмуртъёслэн йӧскалык центрзы» огазеяськон кичӧлтэмъя но Удмуртиысь Кун Кенешлэн, Россилэн азьмуртэзлэн элькунысь мер приёмноез, Йӧскалык политикая министерство но Калыкъёслэн эшъяськон юртсы юрттэмен, удмуртъёслэн вашкала гуръёссыя «Чакара» фольклор фестиваль нырысетӥ вить аръёссэ Удмуртиын ортчылӥз. Нош 2015-тӥ арысен со пӧртэм интыосын радъяськылэ. Нырысь ик куноосты пумитазы Башкортостанысь Калтасы муниципал кылдытэтын, 2016-тӥ арын — Пермь шаерысь Куеда ёросын.
Кукморын фестивалез радъяны «Камсьӧр удмуртъёслэн йӧскалык центрзы» огазеяськонлы юрттӥзы Удмуртиысь йӧскалык политикая министерство но Калыкъёслэн эшъяськон юртсы, озьы ик Кукмор ёрос муниципал кылдытэт, Татарстанысь Калыкъёслэн эшъяськон юртсы но Татарстанысь удмуртъёслэн йӧскалык лулчеберетъя автономизы.