Шаерамы ортче «Быг-Быг» фестиваль

Шулдыръяськонъёс, ӵошатсконъёс ортчозы 3 нунал ӵоже. Шарканысь Быгы гуртын сяна, куноосты возьмало ШарканысьТол бабайлэн юртаз, Зар-Вишур гуртын, ивортэ «Удмурт дунне» газет.

Удмурт адями ушъяськыны быгатэ 200-лэсь уно сиён-юонъёсын. Тодӥськом-а ми, кыӵеесь соос? Зэм, тросэз вунэмын ни, шуо радъясьёс. Соин ик вань мылкыд карисьёс туэ Шаркан ёросысь гуртъёсы поталозы, пересьёслэсь юалляськозы, кыӵе сиён-юонъёс туала вакытэ ӝӧк вылэ уг пуксё ни.

Фестиваль туэ 4-тӥзэ ортче ни. Тодады вайытом, нырысьсэ со радъяськиз Шаркан ёросысь Быгы гурт фин-угор лулчеберетлэн шоркарез луэм бере.

 Фестивальлэн радлыкез:

6-тӥ пӧсьтолэзе

Быгы гурт

11.00 часын – «Быг–быг» фестивалез сӥё–дано усьтон;

11.00 часын – «Кибашлы базар» адӟытон, киужъёсъя мастер–классъёс;

13.00 часын – куспазы вожвылъяськозы элькунысьтымы пӧртэм ансамбльёс.

Тол бабайлэн юртэз
13.00 часын – киужъёсын выронэз утёнлы но азинтонлы сӥзем лаборатория.

7-тӥ пӧсьтолэзе

Зар-Вишур гурт

13.00 – 14.00 часъёсы – фин-угор сиён-юонъёслы сӥзем научно-практической семинар.
Быгы гурт

18.00 часын – Егит пӧраськисьёс куспын вожвылъяськон. Та вакытэ ик «Ыж гон гольф» ӵошатскон, сиён-юонъёсын тодматскон;

18.30 часын – сцена вылын кырӟалозы–эктозы Пермь улосвылысь но Удмуртиысь ансамбльёс. Вань мылкыд карисьёс пыриськозы пӧртэм мастер–классъёс: куиськон, ибырвесь лэсьтон, нӧкы шуккон но варсь пӧзьтон;

20.00 часын – пӧраськисьёсын лэсьтэм сиён–юонъёсты веръян;

21.00 часын – этнопозыръяськон.

8-тӥ пӧсьтолэзе

Быгы гурт

11.00 часын – фин-угор сиён-юонъёслы сӥзем нуналэз сӥё–дано усьтон;

11.30 часын – пӧраськисьёс куспын «Ӵошен ческытгес!» ӵошатскон;

11.30 часын – фин-угор гуртэн, солэн улонэныз  тодматскон. Со вакытэ ик киужъёсъя мастер-классъёс ортчозы;

 15.00 часын – «Быг-быг» фестивалез сӥё-дано ворсан.