Ижкарын удмурт семьяослы чаклам шутэтскон центр усьтӥськоз

Нош али удмуртлыкез утись анайёс пумиськыло пӧртэм интыосын. Та нуналъёсы, кылсярысь, 15 нылпиос но соослэн анайёссы люкаськылӥзы Ижкарысь Киров нимо паркын.

Таиз пумиськон кутскиз тодматскон бордысен. Угось, котькуд люкаськонэ выль анайёс но пиналъёс вуо. Ог-огзэс шедьто интернет вотэсын. Туэ гинэ кылдэм анай клуб 5-лэсь трос пол люкаськылӥз ини.

«Одӥгез пумиськомы суредаськонлы сӥземын вал, — шуэ «Анай клуб» ӵектосэз одӥгез кылдытӥсь Ольга Бикузина. — Милям анайёсмы пӧлын ик вань Катя Мензарипова, со дышетӥз мукет анайёсты но нылпиосты суредаськыны. Пӧламы ик вань Вера Степанова, со валэктэм улсын нылпиос туж усто горд сюйлэсь шудонъёс лэсьтӥзы».

Таяз радэ пумиськонэз радъяз Наталья Шулакова. Покчиос «Нюлэс кузёлэн сюресэз» нимо шудонэ пыриськизы. Котькуд станциын  уж быдэстӥзы.

«Шумпотымон, ужрадысь ужрадэ ми тросгес луиськом шуыса, — вера «Анай клубе» пыриськись Наталья Шулакова. — Туннэ мында адямимы ӧй на вал, 15 кузя нылпиос люкаськизы. Мон малпасько, кармы понна со туж трос, уката ми али гинэ кутскиськом таӵе амалэн ужаны. Туж тау карем потэ анайёслы, малы ке шуоно вань ужмы соослэн мылкыдзы вылын возиське».

http://www.myudm.ru/