Ижкарын Гербер праздникез ортчытыны таяз арын юрттӥз кун филармония
Гербер шулдыръяськонэ арысь аре тросгес калык лыктэ. Но таяз арын куазь воштӥськонъёс пыртӥз. Тросэз доразы кылизы, дыр, лыктэмъёс пӧлысь но куд-огез кошконо луиз. Но йӧзор ортчем бере ик Кызьпу арама нош калыкен тырмиз.
Жаляса верано, зорлэсь техникаез утьыны ӧз быгатэ, микрофонъёс ӧз ужалэ. Но артистъёс олокыӵе но югдурын кырӟаны-эктыны быгато. Валтӥсь сцена вылэ потӥзы Удмуртилэн кун филармониысьтыз коллективъёс — «Италмас», «Шулдыр ӝыт» но мукетъёсыз. Таяз арын филармонилы кылдэмез дырысен 80 ар тырме.
Герберын асьсэлэсь азбаръёссэс усьтӥзы «Удмурт Кенеш» огазеяськон, К. Герд нимо йӧскалык музей, Россиысь тодосъя академилэн Урал ёзэтысьтыз Историяя, кылъя но литературая удмурт институт.
Дышем сямъя, Герберын ӝукез вӧсязы, соин вань люкаськем калыкез утялтӥзы. Йӧзор мылкыдэз ӧз сӥяты. Шулдыръяськыны лыктэмъёс кыразы-эктӥзы но, шудӥзы но.
«Куазь мылкыдмы вылын ӧз шӧдӥськы. Туэ жаль, ваньмызлы зорлэсь ватӥськыны инты чакламтэ шуыса. Вуонояз сое лыдэ басьтыны кулэ, дыр. Но тужгес бадӟым ыштон техника ласянь. Арганъёсмы милям шудо, ми ваньзэ соосты утимы. Котьма ке но, милям азбарамы шулдыръяськон азьланьтӥське, гур ӝуа, перепеч, табань пыже. Калык ӧз кошкы», — вераз «Удмурт Кенеш» огазеяськонлэн тӧроез Татьяна Ишматова.
Кызьпу арамае вуылӥз Удмуртилэн тӧроезлэсь ужзэ быдэсъясь Александр Бречлов но. Со Ижкарын Удмурт лулчеберетъя центр одно ик луоз шуыса вераз но солэн пуштросэз пумысен ӵектонъёсты сётыны куриз. Люкаськем калыкез праздникен ӟечкылаз но ваньмызлы ваньбур, но тупаса улон сӥзиз. «Удмурт Кенешлэн» азбараз улосвыл кивалтӥсез гурысь соку гинэ поттэм перепечен но табанен утялтӥзы.