Вуж Выль аре дэмен шулдыръяськизы пӧртэм выжы калыкъёс

Дас арлэсь кема ини Вуж Выль аре Удмуртиын улӥсь пӧртэм калыкъёс огазе люкасько, шулдыръясько. Праздниклэн вылтусыз, радлыкез гинэ арысь аре воштӥське, нош валтӥсь малпанэз — пӧртэм выжы калыкъёс пӧлын эшъяськыса, ог-огдэ гажаса улон — кыле.

Пӧртэм калыкъёслэн кырӟанъёссы, эктонъёссы, шудонъёссы люкаськемъёсты матэгес каризы.

Таӵе шулдыръяськонын валтӥсь интые уг пуктӥсько адямилэн вераськон кылыз, осконэз. Татын ваньмыз огкылысь шока, эшъяськон кузёяське. 

«Удмурт Кенеш» огазеяськонлэн тӧроез Татьяна Ишматова люкаськемъёслы вазиськиз: «Асьмеос ваньмы мерлыко огазеяськонъёсын ужаськом бере, асьмеос ӵош кулэ люкаськылыны ог-огмес тодман понна, ог-огенымы эшъяськон понна. Та выллем ужрадъёсамы юрттэт но ог-огмылы сётыны, адӟем карыны быгатӥськом».