Комиын финн-угор егитъёслэн «FUROR-2016» форумзы ужаны кутскиз

Коми кунысь Мутница черкогуртэ финн-угор выжые пырись егитъёс люкаськизы.Отын соос гуртоослэн сям-йылолъёсынызы тодматскозы но ас культуразэс утёнъя но азинтонъя ужпумъёс сярысь вераськозы.

Форумлэн ужаз пыриськозы Ханты-Мансийск но Ямало-Ненец автоном округъёсысь, Мурманск но Пермь улосъёсысь, Марий Элысь, Удмуртиысь, Санкт-Петербургысь, Комиысь но Финляндиысь егитъёс.

Удмурт делегацие пыризы – «Шунды» огазеяськонлэн тӧроез Алина Чернова но солэн ёзчиосыз Алина Крестьянинова но Августина Михайлова.

Форумлэн нырысетӥ нуналаз ини «Печа-куча» ужрадын финн-угор азьветлисьёс ог-огзэс шаеръёсазы улонэ пыӵась проектъёсыны тодматозы.

2-тӥ нуналаз пумиськылонъёс, кенешонъёс ортчылозы. Комиысь керттӥськись Светлана Турова ас удысэныз тодматоз но гуртысь егитъёслэн улэм-вылэмзы сярысь вералоз.

«ШудаОлом» огазеяськонлэн кивалтӥсез Инга Усачева эко- но этнотуризмлэн уженыз тодматоз.

«Национальные СМИ и современность» котырес ӝӧк сьӧрын вераськон ортчоз «Коми му» газетлэн редакторез Григорий Хатанзейский кивалтэм улсын.

Этномодаен тунсыкъяськисьёс тодматскозы Комиысь художник-этнофутуристэн Ирина Федосоваен но солэн этномодая театреныз.