Денис Корнилов учкисьёссэ «Анай» выль фильменыз тодматӥз

Фильмысь рольёсты шудӥзы Уддядиысь Лукерьяпай но Ӝакыапай, Удмурт кун университетысь дышетӥсь, профессор Александр Вахрушев. «Анаез» учкыса, тросэз малпало со документальной фильм шуыса.

«Мыным туж удалтӥз актёръёсын. Соос туж умой шудӥзы. Сценарий мон ачим лэсьтӥ. Но верано кылъёссэ ӧй гожъя. Мар сярысь вераськыны гинэ валэктӥ. Соин ик троссэ соос асьсэос малпаса верало. Туж умой рользэ быдэстӥз валтӥсь ролез шудӥсь Лукерьяпай. Зэмзэ ке верано, солэн ӧвӧл нылпиосыз. Со огназ улэ», — вераз Денис Корнилов.

Фильм удмурт кылысь ӟуче но англи кылэ берыктэмын. Соос титръёсын возьматэмын.

«Титръёсты англи кылын фестивальёсын возьматон понна лэсьтӥ. Возьматӥзы ни Эстониын, Финляндиын. Матысь дыре тани Испаниын возьматозы», — валэктэ фильмез кылдытӥсь.

Солэн верамезъя, съёмкаос кык нунал мынӥзы, собере эшшо кӧня ке нунал монтаж бордын ужаз на. Ӝыны час пала кыстӥськись «Анай» фильмез нимысьтыз кыӵе ке нуналлы тупатымтэ ке но, калыке потӥз ӵапак Анайлэн калыккуспо нуналэз азьын.