Биллингвъёс – 2 кылэз тодӥсьёс

«Билингва» семинар арняосы ужась аспӧртэм школа выллем луэ. Татын нылпиос удмурт шудонъёс пыр тодон-валанзэс будэто, анай кылын матэгес тодматско. Нош со вискын анайёсты визьмало нимысьтыз специалистъёс. Пусъёно созэ но: та семинаре нокин нокинэ кужмысь уг келя, анай-атайёс асьсэ мылкыдзыя лыкто, кин ке нылпи садысьтыз ялонэз адӟыса, кин ке Интернетысь вотэсбамъёс пыр иворез шедьтыса, кин ке тодмоезлэн ӝуткамезъя.

Но нырысь ик, мар со — билингва, билингвизм? Латин кылысь берыктыса, со «кык кыл» шуэмез возьматэ. Озьыен, билингвизм — со кык пӧртэм кылъёсын вераськыны, соосты уже кутыны быгатон. «Билингва» семинаръёс — со кема дырлы чаклам но нуналлы быдэ ужась проект. Солэн кылдэмез сярысь маде та проектэз валтӥсь, филология наукаосъя кандидат Татьяна Волкова:

— Ог 10 ар талэсь азьло ай Нациосын ужан политикая министерствоын котрес ӝӧк сьӧрын вераськон мынӥз дышетӥсьёслы сайт кылдытон сярысь. Но соку уж интыысьтыз ӧз вырӟы. 2015-тӥ арын рос-прос кенешимы ни билингвизмъя проект сярысь. Соин кивалтӥз Удмурт кун университетысь Удмурт филологияя, финно-угроведениея но журналистикая институтлэн кивалтӥсез Наталья Кондратьева. Нырысь ик кылдӥз «Билингва» сайт. Собере проектэз валтыны мыным оскизы. Толэзь пала ужаса, валай, та Интернет проект гинэ луыны кулэ ӧвӧл. Озьы семинаръёс радъяны кутскимы.

«Билингвалэн» нырысетӥ семинаръёсыз Ижын ортчизы туэ январь, февраль, апрель толэзьёсы. Соос возьматӥзы: егит удмурт анайёслы но соослэн нылпиоссылы таӵе ужрадъёс туж кулэ. Тужгес но тунсыко, куке та семинаръёсын асьсэ ужан амалъёссы сярысь мадё нылпиоссэс кык но солэсь трос кылъёсын вераськыны дышетӥсь анайёс.