Можга ёросын улӥсь выжы калыкъёс сярысь передача мынэ «Можга» телеканалын

«Котькуд выжы калыклэн вань тунсыкоез, пусйымонэз, — шуэ проектлэн авторез Люция Владимирова. – Соосты дунъяны но гажаны кулэ. Жаляса верано луэ, ӵемысь тросэз валаны но уг туртто артэ улӥсь мукет выжы калыкъёслэсь сям-йылолъёссэс, лулчеберетсэс. Малпаськом, милям программамы юрттоз югдурез умоятыны».

Телеканалэз учко Можгакарын сяна, Можга, Алнаш, Вавож, Ува, Кизнер ёросъёсын. Программа алэсьтыз учкисьсэ шедьтӥз ини. Ӵемысь ёросысь мер огазеяськонъёс передачаез асьсэлэн ужрадъёсазы возьматъяло. Озьы ик сое уже кутыны луэ карын, ёросын, школаосын ортчылӥсь ужрадъёсын.

Эфире потӥзы ини чиганъёс, бесерманъёс, узбекъёс, армянъёс, чувашъёс но казакъёс сярысь телепередачаос.