Удмуртиысь студентка элькунъёслэн кун кылъёссыя Росси олимпиадаязы вормись луиз

Олимпиадалэн нырысетӥ люкетэз ортчиз улосвылъёсын. 138 школьникъёс но студентъёс финалэ потӥзы. Соос пӧлын вал Удмуртиысь егитъёс но. УдГУ-ысь студенткалэсь Марина Пахомовалэсь ужзэ тужгес но вылӥ дунъязы.

«Ми 3 темаос пӧлысь одӥгезъя малпанъёсмес гожтыны кулэ вал. Мон Измаил Срезневскийлэсь «Народ выражает себя в своём языке» афоризмзэ бырйи. Улонысь но литератураысь туконкылъёс шедьтоно вал… Собере котькуд пыриськисьлы 10 минут сётӥське, со дыр ӵоже анай кылын кылбурез лыдӟыны, берыктыны но жюриез вордскем шаерен тодматыны кулэ вал. Мон Кузебай Гердлэсь «Мон кизисько гинэ» кылбурзэ лыдӟи», — вера Марина Пахомова.

Олимпиадае студентъёс сяна, школьникъёс но пыриськизы. Кузебай Герд нимо йӧскалык гимназиысь Мария Федотова 48 ас ёзъёсыз пӧлын куинетӥ инты басьтӥз.

Росси Олимпиадае Можга, Балезино но Пичи Пурга ёросъёсысь дышетскисьёс ветлӥзы. Оглом 10 егитъёс. Удмурт команда Россиысь 20 улосвылъёс пӧлысь куать тужгес но визьмоосыз пӧлы пыриз.