Санкт-Петербургын удмурт кылэз дышето

Удмурт кылэз дышетыны мылкыд карисьёс 10 кузя люкаськизы. Дышетӥсьёс — филолог Ирина Ложкина (вордскиз Кез каргуртын) но студент Богдан Владыкин (вордскиз Дэбес ёросысь Зар-Медло гуртын) дышетскисьёслы ужъёсты сёто мерлык герӟетъёс пыр, нош 2 арнялы одӥг пол ужзэс эскерон понна люкасько.

«Ми нырысетӥ вамышъёс гинэ лэсьтӥськомы, но адямиослы тунсыко, соос сётэм ужъёсты умой быдэстыны выро, — вера «Удмурт кенешлэн» Санкт-Петербургысь но Ленинград улосвылысь ёзэтэзлэн кивалтӥсез Татьяна Серебренникова.

Ватсаса: удмурт кылэз дышетонъя дунтэк курсъёс радъямын Ижкарын 8 интыын, озьы ик Глазовын, Можгаын, Эграын, Кезын, Вавожын, Воткаын, Якшур-Бодьяын но Гракын. Со сяна, очной курсъёс мынӥзы Москваын. Озьы ик кылэз дышетыны луэ кунгож сьӧрысь университетъёсын: Финляндиын, Эстониын, Венгриын, пӧртэм дыре удмурт кыллы дышето Польшаын, Германиын но Франциын.