«Шундысиос» нылпи движение будэ

Куарусёнэ гинэ огазеяськонэ 8 школаос пыризы. Ёзэтъёс кылдӥзы Дэри ёросысь Дэри черкогуртын но Казмас гуртын, Кез ёросысь Александрово гуртын, Пичи Пурга ёросысь Пичи Пурга черкогуртын но Баграш-Бигра гуртын, Шаркан ёросысь Ляльшур, Пашур-Вишур, Быги, Карсашур, Мувыр гуртъёсын, Кез ёросысь Александрово гуртын, Эгра ёросысь Кабачигуртын, Дэбес ёросысь Дэбесын но Зар-Медла гуртын, Якшур-Бодья ёросысь Кекоран черкогуртын, Ижкарысь 56 номеро гимназиын, Вавож ёросысь Бадӟым Гурезь-Пудга гуртын.

«Шунды» огазеяськонэ 14 аресысен гинэ пырыны луэ, — шуэ солэн тӧроез Алина Чернова. – Школаын покчи классъёсын дышетскисьёс но мед тодозы, мед тодматскозы вылэм «Шундылэн» ужаменыз. Мед пичиысен кыдалозы удмурт азьветлӥсьёс. Соос бӧрысь луозы милям кивоштӥсьёсмы. Ӵапак со ик луэ «Шундысиос» движениез кылдытонлэн мугез».

«Шундысиос» движенилэн азьветлӥсез Наталья Казакова пусйе: «Пинал азьветлӥсьёслы «Шундысиос» мерлыко движение радъяске школаын 8-17 аресъем пиналъёсты огазеян понна, мерлыко ужен тодматон но дышетскон, удмурт шӧмо творческой площадка кылдытон понна. 

Пинал удмурт азьветлӥсьёс понна «Шундысиос» мерлыко движение – со луонлык быдэс ар ӵоже пыриськыны удмурт ужрадъёсы но герӟет возьыны пӧртэм школаосысь удмурт пиналъёсын но дышетӥсьёсын». 

Движение пырыны быгатэ котькуд мылкыд карись школа, кытын нылпиос удмурт кылэз дышето яке тунсыкъясько удмурт кылын но лулчеберетэн.