«Зарни-Ё перепеч, табань но пельнянь» фестиваль ортчиз

Дэбесъёс огкылысь оскыто, соослэн ёроссы — перепечлэн кылдэм интыез. Татын гинэ, пе, со трос пумо но сокем ческыт луэ. Дэбесысь туризмъя но лулчеберетъя «Сибирь тракт» центрысь ӧнерчи Галина Опарина вера: «Бадӟым Зетым гуртысь песянай Елена Богданова шуэ, 30 пушкесо перепеч, пе, пыжиськом вал. Фестивальлэн инъетэз со ик луиз. Нош малы зарни? Нырысь ик чебер зарни сӥзьыл вакытэ ортчытӥськом ужрадмес, — азьланьтэ Галина Опарина. – Собере та пыжкем тусызъя шунды кадь, нош шунды со зарни. Мукет но валэктонмы вань на. Варни гурт дорысь шайвылысь шунды-мумы пельугы шедьтэмын. Соин ик вашкала зарни Варниысен кутскыса туала Зарни Медлоозь кыскыны тыршиськом со йылолъёсты но тодонъёсты».

Фестиваль-вожвылъяськонын трос пумо номинациосъя вормисьёс пусйемын. «Тужгес но пичи но бадӟым перепеч» номинациын вормиз Дэбесысь РАЙПО, — вера жюрилэн ёзчиез, фестивалез одӥгез радъясь Дмитрий Корепанов. – «Тужгес аспӧртэмлыкоез перепечсы» луиз Тыловай гуртысь «Ошмес» ансамбльысь нылкышноослэн. Нимысьтыз учкисьёслэсь кузьымзэс утӥзы Улӥ Пыхта гуртысь ӟуч культурая «Рябинушка» центрлэн ёзчиосыз. Соолэн туж ческыт пӧрмиз кузятэмен перепечсы. Нош учкисьёс но дунъясьёс огкылысь нырысетӥ инты сётизы Зар-Медло гуртысь пӧраськисьёслы. Соос татын ик гурын пыжизы 3 пумо перепеч – губиен, кубистаен, пешникен. Люкаськемъёс тросгес куризы пешникен пыжиськемзэс».

Огъя фестивале 5 командаос пыриськизы. Ваньзэ-ӧвӧлзэ 11 пӧртэм зарни перепеч пыжемын. Нош тросгес коллективъёс луысалзы ке, 30 пушкесо перепеч одно люкаськысал, — пусйизы ужрадэз ортчытӥсьёс.