Калыкъёслэн Эшъяськон юртазы кенешизы Москваен валче ужан сярысь

 Котырес ӝӧк азьын Москваысь делегация тодматскиз Калыкъёслэн Эшъяськон юртэнызы.

«Макем паймизы куноос, котькуд калык огазеяськонлэн нимаз кабинетэз вань шуыса. Москваын уго Эшъяськон юртсы воксё ӧвӧл. Соин но Москваысь Нациосын ужан политикая, улосвылъёсын кусып возёнъя но туризмъя департаментэн кивалтӥсезлэн воштӥсез Иван Петров асьмелы вожъяськемзэ вераз», — ивортэ «Удмурт дунне» газет.

Шаерысьтымы 6 ёросын Эшъяськон юрт кылдытэмын. Йӧскалык политикая министр Лариса Буранова верамъя, азьланяз чакламын котькуд муниципал кылдытэтын сыџе юртъёс усьтыны.

— Эшъяськон юрт туннэ культура понна гинэ ужаны кулэ ӧвӧл. — шуиз Лариса Николаевна. — Министерствоен валче ужаса, калыкъёслэн азинскон сюресазы трос лэсьтыны луоно. Со сяна, милемлы юрттӥське Историяя, кылъя но литературая Удмурт институт. Татысь специалистъёс калык пӧлын пӧртэм юалляськонъёс ортчытъяло, анализ лэсьто. Тая ик азьланяз ужан ӧрмы но потэ.

Али бадӟым саклык висъяське Эшъяськон юртын ресурсной центрлэсь ужзэ паськытатонлы. Ӵапак со центр шулдыръяськонъёслэсь но пӧртэм ужрадъёслэсь ӟечлыксэс но пайдазэс эскероз.

— Удмуртилэн ужан амалъёсыз Москвалы туж адӟем карымонэсь, — пусйиз Иван Петров. — Москваын ог 160 выжы калык улэ, кылдытэмын ог 100 калык огазеяськон. Но сюлмаськонъёсмы милям но, тӥляд но огкадесь: тыршоно ваньзэсты валаны.

Москваын 2025-тӥ арозь национальной политикаез азинтонъя стратегия юнматэмын. Со сяна, Интернет вотэсын кылдытэмын аспӧртэм мылкыдъёслы-малпанъёслы инкубатор. Отчы котькудӥз быгатэ Москвалэсь улон-вылонзэ азинтонъя малпанъёссэ но проектъёссэ гожтыны. Азьвыл выжы калыкъёс праздникъёссэс асьсэлы гинэ ортчытъяло вал. Али шулдыръяськонъёссэс, сям-йылолъёссэс вань москвичъёс адӟыны быгато. Со понна ужрадъёсты усьтэм площадкаосын радъясько, отчы котькудӥз пыриськыны мед быгатоз.