«Пумиськон» ӝытын чузъясько юморескаос!

Та ужрадъёс пичи гуртъёсысь удмурт ансамбльёсты герӟаны юртто, ог-огенызы тодматскыны но сюлмысь вераськыны луонлык сёто, озьы ик тужгес усто, быгатӥсь эктисьёсты но кырӟасьёсты шараяло. Пумиськонэ пыриськизы Ольга Танаева, ёросысь «Удмурт кенеш» огазеяськонлэн кивалтӥсез, Автоклубын ужасьёс Макарова Валентина, Митрянов Юра, Андрей Баль, гуртъёсысь удмурт ансамбльёс — Выль Тигырменысь «Тигырмен кенакъёс», Подгорной гуртысь «Купанча», Калашурысь «Чебер апайёс», Вужгуртысь «Бускельёс», Вуж Сальялась «Задор мылкыд», Вужгуртын улӥсь калык, арлыдоос но егитъёс. Люкаськемъёс таяз пумиськонын возьматыны дасяллям сценкаоссэс, юморескаоссэс, серекъятӥсь кырӟанъёссэс но частушкаоссэс.

Ужрад ӝӧк сьорын йылпумъяськиз, удмуртъёслэн, уго, йылол – вань куносты бадӟым ӝӧк сьӧрын табанен, перепечен, шаньгаен утялтыны, кырӟанъёсын, эктонъёсын шулдыртыны.

Огъя йылпумъянъёс лэсьтыку Татьяна Тукаева, ёросысь «Удмурт Кенеш» огазеяськонлэн воштӥсез пусйиз, таӵе пумиськонъёс туж кулэ шуыса, соос пыр ансамбльёс юнмало но будо, асьсэлэсь быгатонлыкъёссэс дунъяло; мукет паласен, ужрад пайдаё луэ будӥсь пиналъёс, егитъёс понна – юрттэ соослы вордскем музъемедлы, кылыдлы, лулчеберетэдлы гажан, данъяськон мылкыд но яратон пыӵатыны.