Быдӟым атыкай ожын пленэ шедем немецъёс Лынгаын ужазы

Ожлэсь азьло ай Лынгаын интыяськем Гулаглэн 147 номеро колониез. Отчы политзаключённойёсты келяло вылэм. Нош 1947-тӥ арын татчы вуттӥзы 200 пала немец военнопленнойёсты. Ар ортчыса, соосты Германие келязы. Нош 20-ез висьыса, кынмыса татын ик кулӥзы.

1985-тӥ арын немец Кивалтэт Лынгае асьсэ улосчиоссылы синпелет пуктӥз. Та интыын немец солдатъёслэн шайвылзы вылэм. Кызьы улӥзы татын военнопленнойёс адӟисьёслэн верамъёсысьтызы гинэ тодо на. Вань ужкагазъёс сутэмын-быдтэмын.

«Татын быдэс территория езэн котыртэмын вылэм, — шуэ Лынга каргуртын улӥсь Галина Вахрушева. – Ожгар пленнойёсты прожектор пиштэм улсын овчаркаосын возьмало, пе, вал. Немецъёс тэль бордын ужаллям: писпуосты корало, сузяло, пельпум вылъёсазы нулло но вагонъёсы тыро вылэм».

Али синпелет котыр чылк-чылк утялтэмын. Сое чакласа возё Лынгаын улӥсь немецъёс. Туннэ но татын уло Бростъёс, Крейзеръёс, Гергердъёс, Флекъёс — пленнойёслэн нылпиоссы. Соку уноез ссылкае келямъёс татын ик семья кылдытӥзы.

www.myudm.ru/