Туэ «Гербер» праздник 4 интыосын ортчоз

Бӧрысь чакламын Можгаын элькун «Гербер» радъяны, нош собере «Удмурт Кенешлэн» ёзчиосыз Менделеевскын ортчоно «Гырон быдтонэ» пыриськозы но берпуметӥез шулдыръяськон Москваын луоз.

Элькун «Гербер» понна кылкуто Эшъяськон юртысь ӧнерчиос. Туннэлы тодмо ни, Можгаын ортчоно шулдыръяськон валъёсын герӟаськемын луоз. Туэ нимысьтыз саклык висъямын луоз ӝукез вӧсянлы — сям-йылол «Герберын» валтӥсь инты басьтыны кулэ.

Со дыре ик рос-прос дасяськон кутскиз ни Ижкар «Герберлы», арлы быдэ со «Кызьпу Арамаын» ортче. Та вакыт выль малпанъёс-дэмланъёсты эскеро.

«Котькуд ар шоркар «Гербер» шулдыръяськонэз тунсыкогес карыны турттӥськом, — шуэ «Удмурт Кенеш» огазеяськонлэн тӧроез Татьяна Ишматова. — Со понна ик кенешонамы Ижкар тӧроосты но Ижкар ёросъёслэсь кивалтӥсьёссэс ӧтчамы. Соослэсь ӵектонъёссэс ми санэ басьтӥськом».