Брангуртын ортчиз нылпи театръёс куспын «Артэ» фестиваль

Вань спектакльёс пуктэмын вал удмурт кылын. Со сяна, сцена вылысь адӟыны луиз на обрядъёсты но литератураен, крезьгурен герӟам возьматонъёсты.

— Фестивале пыриськыны трос коллективъёс мылкыд каро. Вуоно арын, пӧрмиз ке, фестивалез Удмурт театрын ортчытом — клубамы ум тэриське ни, туэ, кылсярысь, учкисьёсын ӵош 200-лэсь уно люкаськимы, — вера Брангуртысь «Кузьыликар» нылпи театрен кивалтӥсь, фестивалез радъясь Ольга Туктарева. — Ӵем йыгасько фольклорной ансамбльёс — асьмемыз возьматыны фестивальёс ӧжыт, шуо соос. Милям театральной фестиваль ке но, кутӥськом ини. Удмурт кылын пьесаос шуген шедьтӥськом. Мон берло дыре ӟуч произведениосты удмурт кылэ берыктылӥсько.

Калыкез паймытӥзы Шаркан ёросысь Сосновка школаысь пиналъёс. «Микрофон — матысь эше» инкуазез утёнлы сӥзем уженызы соос гран-при басьтӥзы. Нырысетӥ интыез куспазы люкизы Можга ёросысь Сибы гуртысь «Пичи актёръёс» но Улӥ Пичи Пурга ёросысь Посьтолысь «Смешарики»  театръёс. 2-тӥ луизы Пичи Пурга ёросысь Брангуртысь «Кузьыликар»  но Сьӧлта ёросысь Сюромошурысь «Теремок» театръёс, 3-тӥе кылизы Кезысь «Солнечный зайчик» но Пичи Пурга ёросысь Шоринь Юриысь «Непоседы» театръёс. Фестивальлэн куноез Василий Москвин гран-при утэмъёслы удмурт калык дэремъёс кузьмаз.

http://udmdunne.ru/2017/04/brangurtyn-ortchiz-nylpi-teatrjos-kuspyn-arteh-festival/