Кизнерын азьланьтӥсько удмурт лулчеберетлы сӥзем нуналъёс

Вань та ужлэн валтӥсь ужпумез — ёросын улисьёслэсь удмуртлыкез, удмурт кылэз утьыны но азинтыны мылкыдъёссэс лӧпкытыны.  Удмурт лулчеберетлы сӥзем нуналъёс улсын та пумысен котырес ӝӧк сьӧрын вераськон но ортчиз.

Пусъем ужпумъёсъя ёросын котькудӥз ас сяменыз, ас амалъёсызъя ужа. Татын аслэсьтыз шӧдскымон интызэ басьтэ шаертодонъя музей.

«Туннэ нуналлы милям музеямы 10 сюрс 200 пала экспонатъёсмы, — шуэ музейлэн кивалтӥсез Вера Савельева. – Фондъёсмес будэтыны ми котькуд ар потаны тыршиськом экспедициосы. Тунсыко адямиосын пумиськылӥськом, вашкала арбериосты  шедьтылӥськом».

Куд-ог музей экспонатъёс тэк ӝажыос вылын уг уло, соос пӧртэм возьматонъёсын но кутӥсько.

«Милям филиалмы вань Вуж Мултанын, соин кивалтэ Ольга Соколова, — азьланьтэ Вера Савельева. — Со улӟытӥз ини вашкала сям-йылолъёсты – йыр-пыд сётонэз, корка пыронэз, ӵӧжи сиёнэз. Ассьэ ужасьёсынызы ӵош соос возьмато со йылолъёсты. Собере  ми асьмеос но котькуд сӥзьыл но тулыс возьматӥськом армие келянэз. Со обрядэз ми юри дасям армие кошкисьёслы. Призывникъёс лыкто анай-атайёсынызы ӵош. Кырӟаса, кузьым кузьмаса келяськом ми соосты».

www.myudm.ru/