Фома Ермаковлы 90 арес тырмысал

Фома Ермаков — нырысетӥез удмуртъёс пӧлын литературоведениея профессор, филолооги тодосъя кандидат луиз. Удыссэ сӥзиз удмурт, ӟуч литератураосты эскеронлы. 400-лэсь трос научной ужъёс гожтӥз. Соос 22 кылъёсы берыктэмын.

Фома Ермаков Вавож ёросысь Итчи-Докья гуртын 6-тӥ классэ вуытозяз гинэ улӥз. Но та инты пыраклы сюлмаз кылиз. Котькыӵе ужпумъёсын отын улӥсьёслы юрттыны тыршиз. Со ёросчиосыз но быдэс Удмуртия понна но бадӟым уж лэсьтӥз Кузебай Гердлэсь улэм-вылэмзэ, ужамзэ эскеронъя. Гурезь-Пудга школаын дано югдытӥсьлы музей усьтыны одӥгез кичӧлтӥсез луиз.

«Фома Кузьмичлэн туж бадӟым материалэз Гердъя люкамын, — шуэ Вавож ёросысь шаертодонъя музеен кивалтӥсь Виктор Шутов. — Соин ик со музеез кылдытонын консультант луиз. Солэн мылкыдызъя Гердлы музей но усьтӥськиз, туннэ со туж адӟем карымон ужаны быгатэ».

Трос тодэ ваёнъёс, ӟеч кылъёс чузъяськизы сцена вылысен. Но та пумиськонэн гинэ ужрад уз йылпумъяськы. «Удмурт Кенеш» огазеяськонлэн Вавож ёросысь ёзэтэз школьникъёсын пумиськылонъёс ортчытыны чакла. Со понна ёросын Фома Ермаков сярысь узыр видеоматериалзы вань.

www.myudm.ru/