Удмуртиын улӥсь немецъёс Пасхаез пусйёзы

Пасхалы сӥзем праздникын «Киндернест» этнокультурной школаысь нылпиос но кырӟанъя «Ювель» но «Омас» коллективъёс концерт возьматозы. Радъямын луоз киужъёсъя адӟытон. Озьы ик ортчозы Пасха дыръя шудонъёс но «История моей семьи» конкурслы йылпумъянъёс лэсьтозы.

Немец сямен Пасха Ostern шуиське. Германиын улӥсьесьёс уноез католикъёс но протестантъёс. Соин валче немецъёс Пасхаез Григориан календаръя пусъё. Солэн вискыз Юлиан дырпуслэсь 1-сен 5 арняозь луэ. Но куке, туэ кадь, Пасха нуналъёс одӥг нуналэ тупало.

Германиын Пасха Рождество выллем кун праздник луэ. Со вакытэ школьникъёс каникулэ пото.