«Удмурт Кенеш» пӧртэм удысъёслы удмурт кадръёс дасяны кутскоз

Кадръёсъя резервез кылдытонъя положениен тодматӥз «Удмурт Кенеш» огазеяськонлэн исполкомезлэн ёзчиез Александр Скобкарёв.

Туннэ нуналлы дась ини огазеяськонлэсь кадръёсъя резервзэ кылдытонъя положение. Люкаськемъёсты соин тодматӥз  «Удмурт Кенеш» огазеяськонлэн исполкомезлэн ёзчиез Александр Скобкарёв.

— Удмурт кадръёсты дасян ужпумъёс сярысь одӥг ар гинэ ум ни вераськиське, — пусйиз Александр Николаевич. — Азьвыл мон малпасько вал: кадръёсты будэтонэн вырыны кулэ власть, али валасько: ачиз калык, асьмеос удмурт кадръёсмы сярысь малпаськыны кулэ. Валтӥсь интыосын, кивалтон удысъёсын удмуртъёслэн ӧжыт луэмзы — со властьлэн сюлмаськонэз ӧвӧл, со калыклэн сюлмаськонэз. Угось власть понна адями нырысь ик ӟеч специалист, профессионал мед луоз. Озьыен, асьмелы сюлмаськоно сыӵе профессионалъёсты шедьтон, будэтон сярысь.

«Кенешчиос» удмурт кадръёсты дасянъя положениез, одӥг ласянь, туж шумпотыса пумитазы, мукет ласянь, сюлмаськонъёссэс веразы: пӧрмоз-а?

— Та положениын вераськон мынэ пӧртэм удысъёслы кадръёсты дасян сярысь, — пусйиз Татьяна Ишматова, — интыысь аскивалтон ёзъёслы, предприятиослы, дышетон удыслы, партиослы… Зэм, шугъяськонъёстэк уз луы. Но интыын сылоно ӧвӧл, кутсконо.