Выльзэ лэсьтон  понна, нырысь вашкалазэ эскероно

Ар ӵоже ужам емышсэс возьматӥзы Алнаш, Кез, Пичи Пурга, Эгра, Дэбес, Кияса ёросъёсысь усточиос.

Ужамзылы вылӥ дунъет басьтӥзы Пичи Пурга ёросысь Вуж Монья гуртысь кибашлыослэн юртысьтызы усточиос. Соос 30-50-тӥ аръёсысь вашкала чильпам айшетъёсты улӟытӥзы. Быдэсак чильпам азькышетъёсты 57-тӥ арын Гожня гуртын лэсьтэм туспуктэмъёс вылысь шедьтӥзы.

Дэбесысь кибашлыос уйпал удмуртъёслэсь выл дӥсьсэс керттэм кышетъёсын узырмытӥзы — пужыос вашкала мадёсъёсысь басьтэмын. Яр ёросысь усточиос егит бесерман ныллы бизён дэремаз кускерттонзэ но айшетсэ огазеязы. Дӥсь узыр чильпаса пуктэм векчи бесерман пужыосын.

«Таӵе проектъёсын ужаса калык аслыз дунъет пуктыны быгатэ, аспӧртэмлыксэ валаны кутске, — вера чеберлыко киужъёсъя элькун центрысь ёзэтэн кивалтӥсь Наталья Прокопьева. – Ӵемысь луэ озьы, адямиос уло со арбериос бордын, нош зэмос чеберлыксэ, кулэлыксэ уг валало ни. Мон туж шумпотӥсько, тани со айшетъёсты вуж моньяос улӟытизы но табере соосты нулдо шуыса. Соослэн верамзыя, айшетъёслы синмаськиллям ини гуртысьтызы бадӟым классын дышетскись нылъёс но «Берпумети чингыли» ужрадазы соос азькышетъёсын потыны мылкыдзэс вераллям ини».

www.myudm.ru/