Ку вуозы удмурт кылын книгаос вузкаронниосы?

Россиын берло куинь ар ӵоже 70 процентэз книгаосын вузкаронниос ворсаськизы. Нырысь ик герӟаськемын со школаосын дышетскон книгаосты нылпиослы дун тырытэк сётъяны косэмен.

«Книгаосын вузкарон сӧзнет куашкамын Элькунамы но, — шуэ «Удмуртия» книгапоттоннилэн кивалтӥсез Юрий Кузнецов. — Вылаз ик почта ёзэтъёс пыр книгаосын вузкарон но уретэмын. Соослэн издательстволы трос гинэ пунэмъёссы люкаськемын — книгаез вузкарыны шуыса басьто, нош уксёзэ уг берыкто».

Но удмурт кылын гожтэм яке удмуртъёс сярысь верась книгаослы кулэяськон вань. Сое валаса, ужбергатӥсьёс издательствое вазисько.

«Али Элькунысьтымы нимаз ужбергатӥсьёслэн туж мылкыдзы вань милям издательствоын поттэм книгаосын вузкарыны, — азьланьтэ Юрий Кузнецов. — Тани Пичи Пурга ёросын ик 10 пала ужбергатӥсёс, кудъёсыз мыло-кыдо выро книгаосты вӧлмытонэн».

Но нырысетӥ вузкарон инты — со ачиз книгапоттонни. Мукетыз — историяя, кылъя но литературая Институт. Татысь басьтыны луэ тодосчиослэсь выль ужъёссэс.

Институтын вузкаронниосын огъя ужан сярысь вераськон уг мыны. Та сярысь малпанэз ӧвӧл «Удмуртия» издательстволэн но. Соин нимысьтыз книга магазинъёсы, бадӟым супермаркетъёсысь книгаосын ӝажыосы удмурт книгаослэн вуон дырзы  тодмо ӧвӧл.