Кинэ пусъёзы Трокай Борисов нимо премиен но пыртозы Данъян книгае?

2023-тӥ ар понна Трокай Борисов нимо йӧскалык премиез басьтоз — Вершинин Павел Николаевич — кун деятель, Удмурт Элькун Кивалтэтлэн Тӧроез (1995-1999), Удмурт Элькунысь Кун Кенешлэн ньыль созывезлэн депутатэз, Удмурт Элькунысь Кун Кенешлэн Тӧроезлэн нырысетӥ воштӥсез (1999-2003), Федерация Кенешлэн ёзчиез (1996-1999), Можга ёрослэн дано адямиез.

Туннэ видеоконференцсвязь амалэн исполкоммы ортчиз. Ужрад улсын юнматэмын вал «Удмурт Кенеш» огазеяськонлэн Данъян Книгаяз пыртон понна ӵектэм азьветлӥсьёсмы но. Трос аръёс ӵоже удмуртлыкез калыке пыӵатэмзы, сямъёсты-йылолъёсты но лулчеберетэз утемзы понна отчы 5 мурт пыриз:

— Викторов Илья Михайлович– инженер-констуктор, 2004-2016-тӥ аръёсы «Удмурт Кенеш» огазеяськонлэн Ленин Ёросысь ёзэзлэн кивалтӥсез, «Удмурт Кенеш» огазеяськонлэн Ижкар Кенешлэн азьвыл тӧроез, мерлыко ужысь ветеран;
— Ермолаева Жанна Михайловна – Шаркан ёросысь Быгы гуртысь удмурт лулчеберетъя йӧскалык центрлэн кивалтӥсез, «Удмурт Кенеш» огазеяськонлэн Шарканысь Ёрос кенешлэн ёзчиез;
— Лушникова Екатерина Александровна — 2000–2013-тӥ аръёсы «Удмурт Кенеш» огазеяськонлэн Вотка ёросысь ёзэзлэн кивалтӥсез, мерлыко ужысь ветеран;
— Ефремова Нина Максимовнаез – Вавож ёросысь Выль Бия шор ёзо школаысь ватсаса тодон-валан сётонъя дышетӥсь, «Удмурт Кенеш» огазеяськонлэн Вавожысь Ёрос кенешлэн ёзчиез;
— Никифорова Ольга Петровна – Глазовысь Короленко нимо пединститутысь доцент, филологи (кылосбур) наукаосъя кандидат, Пичи кенешлэн ёзчиез.

Исполкомчиос озьы ик вуоно Пичи кенешлэсь ортчоно дырзэ но радлыксэ учкизы. Отын ик Данъян книгае пыртэм адямиосты но Трокай Борисов нимо премилэсь выль лауреатсэ данъялозы.