Дом Дружбы народов

    Удмурт выжыкыл – вормисьёс пӧлын

    Удмурт выжыкыл – вормисьёс пӧлын 1

    Арлы быдэ Приволжск федерал округысь егит артистъёсты огазея «Театральное Приволжье» фестиваль, отын школаын дышетскисьёслэн но студентъёслэн театръёссы ӵошатско. Южтолэзе фестивальлэн финалаз пыриськон понна конкурс радъяськиз Удмуртиысь коллективъёс пӧлын.

    Нылпи театръёс пӧлысь тужгес но устоен лыдъямын вал Ижкарысь «Птица» театрлэн Марта Райцеслэн пьесаезъя пуктэм «Колибри-печаль» спектаклез, нош егитъёслэн театръёссы пӧлын – Удмурт кун университетысь «Луна» огазеяськонлэн «Живое» спектаклез.

    Вормисьёс пӧлы шедиз Йӧскалык театрлэн бурд улаз кылдэм «Мимала но шайтанъёс» спектакль но. Сое кылдытыны юрттӥз актёрлэн Константин Никитинлэн «Таврида» фестивальын утэм грантэз.

    «Выжыкыл» студия огазеяз Ижкарысь но ёросъёсысь пиналъёсты, 5 толэзь ӵоже соос тодмасткизы театрлэн улонэныз, актёрлэн уженыз. Озьы, юри соос понна Йӧскалык театрысь режиссёр Константин Ложкин удмурт мифъёс вылэ пыкъяськыса гожтӥз «Мимала но шайтанъёс» выжыкылэз.

    Калык спектаклез нырысьсэ пӧсьтолэзе адӟиз. Со дырысен спектакль бордын ужасьёслэн но, пиналъёслэн но мылкыдзы пуромиз: эшшо но эшшо бадӟым сцена вылын шедэмзы потӥз. Озьы, егитъёс пӧртэм фестивальёсы, ужрадъёсы пыриськыны кутскизы, куд-ог дыръя спектакльзэс Йӧскалык театрлэн сцена вылаз пуктылӥзы.

    – «Театральное Приволжье» фестивальын нырысетӥ степенё диплом утэммы та дырлы тужгес но бадӟым вормонмы, – пусйиз Константин Никитин. – Оскисько, вормонъёсмы эшшо луозы на.