Ижкарысь удмуртъёс толэз келязы

Ижкарын улӥсьёс шундыез яркытгес пиштыны куризы. Озьы соос толэз келязы, тулысэз пумитазы. Шулдыръяськон Кызьпу арамаын ортчиз.

Празднике люкаськемъёслы капчи мылкыд сӥзизы но ӟеч кылъёссэс веразы Кун Кенешысь депутат Любовь Зайцева, «Удмурт нылкышно кенеш» огазеяськонлэн кивалтӥсез, «Удмурт дунне» газетлэн валтӥсь редакторез Елена Миннигараева, «Удмурт Кенешлэн» Индустри ёросысь ёзэтэзлэн кивалтӥсез Галина Никифоровна.

Вань вуэм куноосты шумпотыса пумитазы но шулдыртӥзы Чеберлыко культура юртысь йӧно пияшъёс, «Шунды» дэменлыкысь мусо нылъёс, егит кырӟась Ирина Беспалова но арганчи Саша Ешкеев. Ужрад улсын радъяськизы на пӧртэм ӵошатсконъёс но калык шудонъёс, калыкез котыраз люказы задор эктонъёс. Нош кыӵе ческыт кошкиз пӧсь табанен турын-куарен чай!