Нылкышно – калык лулчеберетэз утись

Таӵе нимын 16-тӥ южтолэзе Эгра ёросысь Кедра Митрей нимо ёрос библиотекаын семинар-концерт ортчиз. Со сӥземын вал «Удмурт нылкышно кенеш» огазеяськонлы 30 ар тырмонэзлы но Егитъёслэн арзылы.

Вераськонъёс тунсыкоесь пӧрмизы. Историк Тамара Никитина анай кылъёслэн кулэлыксы сярысь мадиз. Соосты улонэ паськытгес вӧлмытон понна нокыӵе нимысьтыз ужрадъёс, коньдон но кулэ ӧвӧл.

Этнодизайнер Надежда Касаткина ужрадэ вуэмъёсты выльысь синмаськытӥз вашкалаосмылэн пиосмурт но нылкышно дэремъёссылы. Залын пукись егитъёслэн мылкыдзы ӝутӥськиз удмурт вашкала дӥськутэз ас вылазы мертаны.

Кырӟась, крезьгуро инструментъёсын шудӥсь но та мур пуштросо, шуныт, тунсыко ужрадэз дасясь Лия Лекомцева кузпалыныз Дмитрий Лекомцев ӵош возьматӥзы, кызьы удмурт кырӟанъёс, эктонъёс пыр нылпи ас выжыеныз тодматске.

Сундурысь А.Г. Чирков нимо удмурт культурая центрлэн кивалтӥсез Светлана Дмитриева удмурт сиён-юонъёс сярысь ивортӥз. Вашкалаосмы ас киосынызы будэтэм пудо-животысь, бакча сиёнъёсысь сиён-юонъёс дасяллязы, инкуазен огкылысь улӥзы.