Пичи Пургаын ортчиз нырысетӥез «Удмурт дебатъёс» ёрос вожвылъяськон
«Кулэ-а туала улонын вылӥ образование?» – та сярысь эчешизы-кенешизы Баграш-Биграысь, Гожняысь, Вуж Мӧньяысь, Улын Юриысь, Пичи Пурга гимназиысь но нырысетӥ школаысь 8-тӥ-11-тӥ классъёсын дышетскисьёслэн командаоссы.
Ужрадэз радъязы «Удмурт Кенешлэн» Пичи Пурга ёросысь ёзэтэз, Администрациысь дышетонъя кивалтэт, Пичи Пурга черкогуртысь гимназия, ёрос лыдӟиськон юрт, удмурт кылэз но литератураез дышетӥсьёс. Нош кичӧлтон сётӥсез луиз Пичи Пурга гимназиысь удмурт кылъя дышетӥсь Александра Герасимова.
Удмурт дебатъёс ортчизы туж ӟырдыт. Пиналъёс шудонлы мылысь-кылысь дасяськиллям, дасяллям аргументъёс но, контраргументъёс но. Ваньзэ чебер удмурт кылын!
Ужрадэ вуылӥз «Удмурт Кенеш» огазеяськонлэн тӧроез Андрей Ураськин. Со пусйиз, сокем узыр удмурт кылын котькыӵе удысын вераськыны луэ шуыса.
