4-тӥ тулыспалэ – Йӧскалык печатьлэн нуналыз
Сое юнматон сярысь кат Удмурт Элькунын 2020-тӥ арын кутэмын.
Со улсын толон, 3-тӥ тулыспалэ, Кун Кенешын анай кылын гожъяськисьёсты сӥлы карон ужрад ортчиз, отын удысазы адӟем карымон ужасьёсты вылӥ данъетъёсын пусйизы.
Пумиськонэ элькун, кар, ёрос газетъёслэн валтӥсь редакторъёссы, ёрос изданиослэн удмурт ватсэсъёссылэн редакторъёссы, журналистъёс люкаськизы. Йӧскалык печатьлэн нуналызлы сӥзем ужрадэ вуизы Удмуртилэн палэназ анай кылмес утисьёс но азинтӥсьёс: Башкортостанысь «Ошмес» но Татарстанысь «Азьлане» газетъёс. Озьы ик удмурт эшъёссылэн ужаменызы тодматскыны лыктӥзы «Издательский дом Коми» юртысь редакторъёс.
Сӥё-дано ужрадэз ортчытӥз Кун Кенешлэн тӧроез Владимир Невоструев. Люкаськемъёсты ӟечкылазы элькун кивалтэтлэн тӧроез Ярослав Семёнов, Кун Кенешысь, Кун думаысь депутатъёс, удысэтъёслэн кивалтӥсьёссы.
Нош Вавож ёросысь «Валан» ансамбль шулдыр кырӟанъёсыныз мылкыд кузьмаз.