14-тӥ толшоре Кузёбай Герд вордскем дырысен 124 ар тырмиз

Солы сӥзьыса, шаерамы ортчизы буре ваён ужрадъёс.

«Удмурт Кенеш» кичӧлтэмъя арлы быдэ Ижкарысь Йӧскалык музей вӧзысь Кузебай Гердлэн синпелетэз доры вань мылкыд карисьёс люкасько. Таяз радэ но отчы трос калык вуиз. Нылпиос, студентъёс Кузебай Гердлэсь кылбуръёссэ лыдӟизы, вань лыктэмъёс синпелет доры сяськаос понӥзы.

Ужрадэ пыриськизы культурая министр Владимир Соловьёв, «Удмурт Кенешлэн» Тӧроез Татьяна Ишматова, йӧскалык музейлэн кивалтӥсез Александр Волков, тодосчиос Алексей Загребин но Галина Глухова.

Вавожысь синпелетэз доры люкаськылӥзы школаын дышетскись пиналъёс. Ӟеч кылъёсын тодэ ваизы Кузебай Гердэз депутатъёслэн ёрос Кенешсылэн тӧроез Александр Шишкин но «Удмурт Кенешлэн» Вавож ёзэтэзлэн кивалтӥсез Ирина Ложкина.

Нош пургаос «Кин тон, Кузебай Герд?» акция ортчытӥзы. Соос ураме потаса, пӧртэм ужъюртъёсы вуылыса, Кузебай Герд сярысь юалляськон ортчытӥзы.

Ивортон басьтэмын «Удмурт кенеш» огазеяськонлэн вотэсбамысьтыз