Мачкон ӝытъёс

Анна Зайцева, Вавож ёросысь Гурезь-Пудга шор ёзо школаысь дышетӥсь

Кузебай Герд туж вылӥ дунъяз калык веранъёсты. Школаын дышетскыкуз ик со бадӟым саклык висъяз кырӟанлы, тужгес но сюлмаз пыӵамъёссэ соку ик гожтыса кельтэ вал. 1912-тӥ арын гожтыса кельтэмын анаезлэн Софья Никифоровналэн (Миквор Огилэн) но гуртоосызлэн, Опоч Элелэн, Педор Сарилэн, кырӟанъёсыз-веранъёсыз. Кырӟанлы сяна, бадӟым саклык висъяз мадиськонъёслы но. Кузебай Герд бичаса кельтӥз сюрслэсь ятыр мадиськонъёс. Но жаляса верано луэ, тросэз соос асьме дорозь ӧз вуэ.

Мадиськонлы сӥзьыса, Кузьма Павлович гожтӥз научной ужъёс, соос вылэ пыкиськыса — «Вотяцкая загадка» диссертацизэ, кудӥз, жаляса верано луэ, асьме дорозь ӧз вуы. Кык уженыз мон тодматски: «Мадькылъёс» но «К изучению вотских загадок».

Мадиськон — со туж вашкала дыръя кылдэм калык кылбурет, но туж вашкала дыръя кылдэмез асьме доры туж ичи вуэмын, пусъе Кузебай Герд.

Мадиськонъёсыз туж вашкала дырысен мукет калыкъёс куспысь но шедьтылӥськом. Шундыӝужан палан уно калыкъёс туж вашкала дыръя ваче куспазы мадиськыса вожвылъяськон тупатъялозы вылэм. «Эдда» нимо скандинав эпосын инмаръёс бакатыръёсын (богатыръёс, дыр), ваче мадиськонъёс вераса, огзэс огзы вормьны туртско.

Ӟуч выжыкылъёс верамъя, отын мадиськонъёсыз Баба Яга, вунылъёс верало. Кин ке мадиськонэз сэрттыны, тодыны уг ке быгаты, сое Баба Яга сие, вунылъёс бичатыса виё.

«Мар выжытэк будэ?» (из), «Мар сяськатэк сяськаяське?» (турикук), «Кин уллятэк бызе?» (ву) — тӥни сыӵе мадиськонъёсыз адямилы вумуртъёс, палэсмуртъёс вералозы, пе, вал, шуэ вашкала выжыкыл. Адями уг ке тоды верам мадиськонэз, сое, пе, олокызьы но сӧсыръяло, серем каро.

Вашкала дыръя узыръёс но эксэйёс мадиськонъёсыз куанеръёсыз зӥбон понна но кылдытъялозы вылэм.

Мадиськонъёсыз тодыны быгатэм вашкала дыръя туж уно куанер адямиослы юрттылэм но: куддыр урод, лек эксэйёс но виыны пуктэм ужасьёслы мадиськон, пе, вералозы вал: «Тод, мынам ваньбурелэн кыӵе дуныз». Виыса куштыны пуктэм мурт вера вылэм бадӟым лыдпус, нош узыр адями туж шумпотэ, куддыр лыдпусэз ачиз но валаса уг вутты. Шумпотэменыз сое, пе, эрказ лэзе. Ныллэн быземез ке уг поты, соку со ныл карт луонэзлы мадиськон вера: карт луонэз со мадиськонэз тодыны ке уг быгаты, мар луонзэ уг ке шедьты, соку нылэз басьтытэк кельтэ, ныл яратонтэм муртлы бызьтэк кыле.

Ма со мачкон жытъёс? Бусы ужъёс бырыса, кизем ю-нянь потыса юнма ке, пудо-живот гидэ пыремын но куазь каллен толмыны кутске ке, Вало, Ува, Кылт, Нылга шуръёс котырын улӥсь Докья выжыысь удмуртъёслэн кутско ни мачкон жытъёссы.

Вашкала дыръя, кытӥ-кытӥ туала аръёсы но, кызьы пусъе Герд,
удмурт гуртъёсын кыӵе ке корка огазе люкасько но, кин кызьы быгатэ, огзылы огзы мадиськонъёс вераса пуко. Глазов уездысь удмуртъёс мачкон жытъёс ортчытъяло вылэм 25-тӥ толсурысен 6-тӥ толшорозь гинэ. Мукет вакытэ сыӵе жытъёс уг ортчытъяло, уг лэзё вылэм. Нош Докъя выжыос азьвыл ортчытъяло вылэм котькуд гуртын Пукро праздникысен Йӧвылэсултон дорозь. Люкасько татчы мӧйыез но пересез, егитэз но шоро-куспоез, нылъёс но пиос. Нылъёс сьӧразы куто черсон, керттӥськон, нош воргоронъёс кут кутало яке гозы пуно. Корка шоры пуксе самой мӧйы мурт, нош мукетъёсыз котырак. Бӧрысь мӧйыез бордысь выжо черодэн егитъёс борды. Нырысь кутско адями сярысь мадиськонэн, собере выжо корка но корка котыр, пудо-живот, одворча, гурт, бусы, тэльёс доры… пумен кыдёке кошко, мадиськонъёслэн пуштроссы паськыта.

Удмуртъёслэн мадиськон жытъёссы герӟаськемын инкуазьлэн воштӥськеменыз, шундыен, будонэн. Соин ик мадиськон ӝытъёс кутско инкуазь кӧлыку. Мадиськонлэн кужымез туж бадӟым. Нош кунянъёс, ыжпиос, чуньыос вордскон вакытэ мадиськон ӝытъёслэн дырзы быре.

Мадиськон ӝытлэн аслаз катъёсыз: нырысь ик верало вашкалаоссэ, кудъёссэ пинал калыклэн кылэмзы но ӧвӧл. Соос туж сак кылзо, пелязы поно но, ма со шуыса, тодыны тыршо. Кудӥз пырак соку выль мадиськон кылдытэ. Лыктэмъёслы со яра ке, со мадиськон мукет корка выже ини. Дыр ортчемъя, со котькинлы тодмо луэ.

Мадиськонын ноку но кыӵе ке арбери сярысь шонер верамын уг луы, со арбери сярысь юри ватыса, аллегорической амалэн верамын луэ. Тӥрлыклэсь кыӵе ке одӥг туссэ, тодмо интызэ басьто но, арбериез ассэ вератэк, солэсь пичи люкетэзлэсь туссэ гинэ верало. Мадькылын со арбериез юри алдаса кадь верало. Кылсярысь: Одӥг турын кабанэз вить ыжпиос кыскало. Ма со? Кабан кадь сюмори бордын куж бинялтэмын луэ; вить ыжпиос кадь, кышномуртлэн чиньыосыз, со кужез кыскаса, сӥньыс черсо. Табере валамон: со черсон луэ.

Вашкала дыръя мадиськон вераны усто быгатӥсь муртэ визьмо шуозы вылэм. Вало котырын улӥсьёс туж аспӧртэмлыко учко вылэм котькуд кыл шоры. Докъя выжыысь удмуртъёслэн малпамзыя, котькуд верам кыллэн вань аслаз кужымез. Дунне вылын ваньмыз улэ аслаз катъёсызъя: ваньмыз воштӥське, улӟе, будэ но улонысь кошке сыӵе дыре, ку со висъямын. Но со катэз воштыны быгатэ адями аслаз аспӧртэмлыко верам кылыныз, учкеменыз. Кытӥ-отӥ умойтэм учкем, урод верам кыл но юриськыса каргаськем огазе люкасько но инкуазьлэн огсыр катъя улоназ умойтэм воштӥськонъёс пырто. Озьы ик Докъя выжы калыклэн вань сыӵе осконэз но веранэз: куд-ог луло но лултэм макеос сярысь уг яра вераны нимынызы, соос, пе, маке но умойтэмзэ лэсьтыны быгатозы. Огез соос пӧлысь Гондыр. Со, пе, ваньзэ кылэ, ма со сярысь верало. Соин ик со сярысь умойтэмен вераны уг яра, нимзэ но шонерак верано ӧвӧл, шуоно гажаса «быдӟым дядя».

Гондырез ӧд ке гажа, со адямилы изъян ваёз, вӧсь карыны но быгатоз, пудоез но таркалоз.

Удмурт мадиськонъёс пӧртэм-пӧртэм верамын луо. Кудӥз соос заговорлы укшало. Кылсярысь, «марлэн быжыз ӧвӧл?» (излэн). Та кадьгес ик пелляськисьёслэн пеллян кылзы вань: «куке из выжы лэзиз ке, куке гур вылэ вож турын потӥз ке, — сокутэк та адямиез сиыны-юыны медад быгаты…»

Удмуртъёсты кужмысь Инмарлы осконэ пыртылӥзы, удмуртъёс пӧлы уно подъячъёс гыж-гыж лыктӥллям. Со вир сюпсисьёс сярысь но мадиськонын верамын. «Чирк! Чорк! Сьӧд подъяч» Мар-о со луоз? Со — пыӵ. Пыӵ сямен ик, начальникъёс но удмурт ужась вылын вирзэс сюпсьыса пукиллям.

Уноез мадиськонъёс кылбурен тупатэмын: рифмаез но, ритмез но пуктэмын. Кылсярысь: «Петыр котыр, корка котыр си биньгозы» (ӝуй). «Мугорыз котырес, бамыз вальырес» (уксё), «Топ! Топ! Топонли! Монли! Сач! Сач! Сачанли! Манли!» (кутсаськем).

Вылӥ возьматэм мадиськонъёсысь адӟиськомы: улэмзыя соос чебермыса кошкиллям. Кин ке но одӥг адями мадиськонэз вера но, сое мукетыз сю, сюрс адямиос огзылы огзы верало, гуртысь гуртэ вутто; верамъязы ялан волятыса, вераны капчи карыса тупато. Кылдытӥсез одӥг адями: малпам, верам но, солэсь верамзэ мукетыз кылэм, — тӥни озьы мадиськон мукетызлы тодмо луэм; мукетыз сое кулэезъя, чебергес карыса, волятыса верам.

Кудӥз мадиськонъёс, мае ке юам кадь, юаса лэсьтэмын:

-Мае ӵоге ошыны уг луы? (курегпузэз)
-Мае серметэн кутыны уг луы? (толэз)
-Веньлэсь йылсо мар луоз? (син)

Кудӥз мадиськонъёс, ваче вераськем кадь карыса, диалоген лэсьтэмын луо:

— Вож-вож, кытчы мынӥськод?
— Кырыж-мерыж, тынад мар ужед? (сюресэн узьым озьы верасько)

Арысь аре, вапумысь вапуме удмуртъёслэн улон-вылонзы воштӥськыса кошке. Экономиказы но, ӧнеръёсы но, улон интыоссы но уно пол воштӥськылэмын. Улон воштӥськемъя, мадиськонъёс но ялан воштӥськыса кошкемын. Чорыгаса улыкузы, удмуртъёс чорыган пушкысь мадиськон вералозы вылэм, пӧйшураса улыкузы — пӧйшуран сярысь но пойшуръёс сярысь. Бӧрысьгес — музъем ужан сярысь, юртъер котыр сярысь. Школаос усьтӥськем бере — школа, дышетскись пиналъёс, книгаос сярысь мадиськонъёс кылдӥзы. Гуртэ телеграф, телефон, чугун сюрес, аэроплан вуиз, одно ик со но палэнэ уг кыльы, пусъе Кузебай Герд.

Сюрс аръёс ӵоже ялан улыса, улытозязы воштӥськылыса, уно сюресъёстӥ ветлыса, уно ым пыр, уно кылэ-ыме пыраса, соос туж сураськыса, туж воштӥськыса, туала аръёс дорозь вуэмын.