Кузебай Герд но туала удмурт кыл

Валентина Ившина, педагогика наукаосъя кандидат, «Удмурт Кенешлэн» Ижысь Октябрь ёросысь ёзэзлэн кивалтӥсез

Эскерисьёс

Та темаез рос-прос эскерылӥзы ини асьмелэн туж тодмо удмурт тодосчиосмы — В. Алатырев, И. Тараканов, А. Шкляев, В. Кельмаков. Палэнэ уг кельто егитъёсыз но тодосчиос — Н. Кондратьева, Л. Бусыгина, Л. Ившин, Т. Душенкова но мукетъёсыз. Авторъёс гожто: Кузебай Герд трос лэсьтӥз удмурт кылтодосэз (лингвистикаез) азинтон, удмурт литературной кылэз кылдытон но радъян, удмурт кыллэсь кылтӥрлыксэ (лексиказэ) узырмытон, удмурт кылэз чылкытатон но волятон понна.

В. Кельмаков профессор пусъе: Кузебай Герд 300 пала выль кылъёс кылдытӥз, соос пӧлысь ог 100 мындаез улонэ пыӵазы 1920-тӥ-1930-тӥ аръёсы азькыл,ужазинлык, уждун, азьветлӥсь, калыккылос, кунгож, инкуазь выллем кылъёслэн авторзы вань шуыса малпан но уг кылды ини.

Вераны кулэ, берло аръёсы Удмурт Элькунысь Нациосын ужан политикая министерство бордын ужась Термино-орфографической комиссия выльысь берыктӥськиз Кузебай Гердлэн нимкылъёсыз борды но бырйиз пӧлысьтызы тунсыко но чылкак удмурт шӧмооссэ: покчилык,школаозь яке школаазь дышетон, удмуртан, устолык но мукет.

Улон-вераськон

Нош кызьы эскериз но дунъяз удмурт кыллэсь общественной функциоссэ, макем со паськыт кутӥське. Малпасько, та ужпумъёс туж мур эскеремын ӧвӧл на.

Удмурт кыллэн улонын кулэлыкез сярысь Кузебай Герд трос гожъялляз пӧртэм статьяосаз, печатлаз газет бамъёсын но журналъёсын ӟуч но удмурт кылъёсын. Тужгес но тодмо, дыр, 1925-тӥ арын «Гудыри» газетын потэм «Малы удмурт кыл кулэ?» статьяез. Со печатласькиз 2-3 номерын.

Анай кыллэн узырлыкез, сярысь Кузебай Герд тазьы гожтэ: «Котькыӵе кыл — со одӥг адямиен гинэ кылдытэмын ӧвӧл. Со быдэс калыкен сюрс аръёс ӵоже кылдытэмын. Та сюрс аръёс ӵоже калык мар малпаз, мар ужаз, мар выль улон сямъёс кылдытӥз — со ваньмыз кыл пушкы понэмын. Удмурт калыклэсь улэм-вылэмзэ, историзэ тодэмед ке потэ, удмурт калыклэн кыл пушказ учкы. Сое бугыртыны гинэ кулэ». Отӥяз Кузебай Герд будэтэ: «Одӥг дышетӥсьлэн но со мында нылпиез дышетэмез уз луы, ма мында нылпиез ас вордскем кылыз дышетэ. Ас вордскем кылызлы дышетскыкуз, пичи пинал пусъёслы, букваослы гинэ уг дышетскы — со ас кылысьтыз, бадӟым ву юэм сямен, уно тодонлык но шедьтэ, уно кужым но шедьтэ, ас визьзэ но паськытомытэ, бурдъяськытэ».

Та бадӟым статьязэ лыдӟыкуд, соку ик малпанэ вуиськод: макем визьмо, кужмо, мур малпаса, кыллэсь азьпалзэ чакласа, гожтэмын! Шодӥське трос лыдӟиськемез, паськыт то мур тодон-валанэз, югдурез шӧдэмез-валамез. Кузебай Герд тупен-тупен валэктэ анайт кыллэсь дунзэ но кулэ луэмзэ калыклэн улон-вылоназ.

Ӵектонъёс — быдэс программа

Кузебай Гердлэн ӵектонъёсыз быдэс концепцилы, программалы тупало. Тани со гожтэ «Удмурт областе — удмурт кыл» статьяяз: «Удмурт область потэм бере, улон-вылонэз выль сямен тупатъяны ачиз удмурт крестьян кутскем бере, асьмелэн азямы нош ик удмурт кыл быдэс мугорыныз султэ. Кытчы удмурт кылэз пыртоно, макем пыртоно, кызьы пыртоно — та ужъёс сярысь табере нуналлы быдэ вераськон потэ».

Кузебай Герд сюлмаське: удмурт кыл коркан гинэ медаз улы, сое пыртоно школае, учреждениосы, улонлэн пӧртэм удысъёсаз. Улонэз выльдон борды кысконо, пе, ассэ удмурт калыкез. Нош со понна удмурт адями дышетскыны кулэ. Озьыен 1-тӥ интые потэ кадръёсты дасян.

«Удмурт педтехникумын — асьмелэн удмурт калыкез пӧзьтон, выльдон пуртымы, — азинтэ ӵектонзэ Герд, — соин ик удмурт педтехникумъёс сярысь асьмелы туж уно сюлмаськыны но туж уно вераськыны кулэ на». Собере учёной мукет юан пуктэ: педтехникумъёсын кин удмурт дышетӥсьёсты дасялоз? Ачиз ик валэктэ: ӟуч вылӥ дышетскон университететъёс, институтъёс асьмелы удмурт дышетӥсьёсты уз дасялэ, Соосты дасян понна удмурт институтъёс кылдытоно.

Гердлэн таӵе малпанъёсыныз тодматскыса, энциклопедиез лыдӟем кадь потоно: «Дышетон уж – косон уж медаз лу, чик косытэк, ачиз шумпотыса нылпи мед дышетскоз — таӵе мед луоз котькыӵе педагоглэн малпанэз. Та малпам сямен котькыӵе ас ужзэ тодӥсь, ас ужзэ яратӥсь педагог мед ужалоз». Та чуръёс асьмелы возьмато, макем сюлмаськылӥз Герд удмурт кадръёсты ӟечлыко дасян пумысен но.

Туж ӟырдыт но, со дыре ик туж оскымон, туж вольыт кылын гожъяз Кузебай Герд та ужпумъёс сярысь ӟуч сямен но «Ижевская правда» газетэ, «Жизнь национальностей» журналэ. Тани удмурт кылэз школае пыртон сярысь «Вотские дети и родной язык» нимо статьяяз со валэктэ примеръёс вылын: «…Оказывается, ребёнок не понимает, что читает по-русски. Вот факты: ребенок-вотяк читает «конь». Спрашиваю, что это по-вотски? Отвечает: это «коньы» (т.е. белка). Еще пример: читает «путь». Спрашиваю, что это, скажи по-вотски? Отвечает: «пурт» (т.е. нож). Внешнее звуковое сходство слов сбивает ребенка с толку. И где уж тут творчество ребёнка, где работа его мыслей? Это только мучение для него».

Быдэсмизы-а, ӧз-а?

Визьмо тодосчи но общественник Кузебай Герд нош но нош валэктэ, малы кулэ улонын удмурт кыл. «Вотский язык — орудие просвещения удмуртов» нимо бадӟым статьяын со тупен-тупен валэктэ вордскем кыллэсь улонын кулэ луэмзэ, Нош удмурт кылын статьяяз валэктэ: «Удмурт кыл – югыт дуннее сюрес… Тӥни та удмурт кылэз школае пыртон, улон пушкы пыртон уж озьы огез бӧрсьы огез герӟаськыса кошке, урдэм пагӟа, тубат кадь, асьмелэн азямы султэ. Со пагӟалэсь одӥг лёгетсэ ке ӵогид, пагӟа сориське, соку со тубат кузя югыт, шундыё выль дуннее асьмэлэн тубеммы уз лу ни».

Сыӵе вылӥ дунъет сётэ удмурт кыллы Кузебай Герд, озьы со адӟе удмурт кыллэсь улонын пайдазэ-интызэ.

Удмурт кунлыклы 100 ар тырмон азьын амалтэк юан кылдэ: улонэ пыӵазы-а, зэмазы-а, быдэсмизы-а Кузебай Гердлэн ӵектонъёсыз, малпанъёсыз? Веранэз ӧвӧл, даур ӵоже туж трос ужъёс быдэстэмын. Озьы ке но удмурт кыллэн утиськемезъя но улонын кутӥськемезъя сюлмаськонъёсмы тырмыт. Ӵем ӝутӥськом та темаез, бугыртӥськом, куддыръя ог-огмес пыкылонэ но вуиськом. Соку нош ик Кузебай Гердлэсь гожъямъёссэ, индылэмъёссэ тодамы вайиськом. Соос али верамын но гожтэмын кадь — сыӵе ик лэчытэсь.