Элькун тӧрлык мерлыко йӧскалык огазеяськонъёслэсь ужзэс умоен пусйиз

Удмуртилэн Тӧроезлэн но Кивалтэтлэн пресс-службаез ивортэмъя, «ПоддЕРжка» акци борды кутсконаз ик Удмуртиысь трос мерлыко огазеяськон итӥськиз. «По родному краю с любовью» мерлыко ӵектоссэс соос мукетгес каризы, табере пандемия улсын шуг-секытэ сюрем калыклы юртто.

Шуге-леке сюремъёс пӧлы трос нылпиё семьяос, оген кылем анайёс, пенсионеръёс но сӧсыръёс сяна кунгож сьӧрысь студентъёс но пыро.

Соослы нимысьтыз юрттэт сётӥське. Сиёнысен кутскыса пыдктутчанозь но дӥськутозь. Армян мерлыко «Урарту» огазеяськонысь азьветлӥсьёс (тӧроез Мнацакан Аракелян) Сарапул ёросысь трос нылпиё анайлы юрттэт сётӥзы. Та анайлэн 7 нылпиез. Оштолэзьлэн кутсконаз семьялы сиён-юон ваизы, собере — пыдкутчан, дӥськут, нылпиос дорысенынзы дышетскыны мед быгатозы шуыса компьютер. Сиён-юонэн юрттэт даслэсь трос семья басьтӥз на.

Удмуртиысь таджик «Ориён-Тадж» мерлыко центрысь (тӧроез Мирзо Умаров) волонтёръёс трос нылпиё но ёрмыса улӥсь 12 семьялы бакча емыш наборъёс дасязы.

Со сяна, таӵе юрттэт ИжГТУ-ысь, Эм Академиысь, но ИжГСХА-ысь студентъёс но басьтӥзы. Нош 4 семьялы уксёен юрттӥзы.

Удмуртиысь азербайджан «Достлуг» центрысь (тӧрозы Зульфигар Мирзаев) азьветлӥсьёс пенсионеръёслы, трос нылпиё но ёрмыса улӥсь семьяослы, УдГУ-ысь студентъёслы юрттӥзы. Соос сиён-юонэн наборъёс люкылӥзы. Наборъёс пушкын тужгес но кулэ луись сиён-юон:пызь, сакыр, вӧй рис но сьӧдчабей кеньыр, макарон, тушёнка, печення, чай, сок но мукет. Таӵе юрттэт Ижкарвсь 60 семья но 120 студент басьтӥз.

Еврей «ХЭСЭД Ариэль» мерлыко благотворительной фонд (тӧроез Марк Гольдин) сиён-юонэн 50 набор дасяз, соос али Ижкарысь семьяос кие вуо ини.

Со сяна адресэн юртто на Удмуртиысь Бигер мерлыко центрысь, (кивалтӥсез Ильсур Миннуллин), Улосвылысь бигеръёслэн йӧскалык автономиысьтызы (тӧроез Рпмсия Габбасова) азьветлӥсьёс но «Немецкая национально-культурная автономия УР» мерлыко огазеяськонысь (тӧроез Майя Шушкова) волонтёръёс.