Кызьы Удмуртиысь йӧскалык огазеяськонъёслэн ачид астэ нимаз висъян дыръя улонзы ортче? Армянъёс

Армян диаспораысь адямиослэн ужзы сярысь вераськыкумы, тросэз соос пӧлысь доразы пуко шуыса тодӥмы

«Тросэз доразы пуко. Со сяна, лэсьтӥськон-пуктӥськон вакыт ӧз на кутскы вал ай. Ми пӧлысь 60-70% процентэз уго ӵапак та удысын тыршо. Ог дас пала адямимы ӟечлэсьтӥсь (благотворительной) юрттэт сётэ. Егитъёсмес ёросъёсы сиён-юон вуттыны лэзиськомы. Куд-ог учыръёсын ми асьмеос тодӥськомы, кинлы али юрттэт кулэ, муккт дыръя Йӧскалык политикая министерство но Спортъя министерство милемлы вера, кинлы али юрттэт кулэ шуыса»,

– вера Мнацакан Аракелян.

Армян огазеяськон министерствоослэсь юрттэмзэс быдэстэм сяна, Ижкарысь но Удмуртиысь епархиен радъям юрттэт борды но итӥське. Соос пӧлын «Огъя Росси» партилэн «ПоддЕРжка» акциез но.

«Ӟечлэсьтӥсь кузьымъёсмес котькинлы сётӥськом, кыӵе калык ум учкиське. Толонваллян, кылсярысь, Ӟуч Вожой гуртэ ньыль нылпиё семья доры ветлӥ. Со сяна, одӥг пияшсы лэн вордскем нуналыз вылэм, солы ини нимысьтыз кузьым дасямы. Кыӵе калык луэмзэс ми ум ик юаське. Туннэ нунал понна ми 150-лэсь трос семьялы юрттӥм ини. 95% процентэз соос пӧлысь — ӟучъёс но удмуртъёс»,

– вера армян диаспоралэн азьветлӥсез.

Бизнес удысын диаспораысь адямиос туннэ понна сиён-юон вузкаронниосын гинэ ужало. Кафеос, спортзалъёс но мукет учреждениос ворсамын. Армян воскресной школаын занятиосты огдырлы дугдытӥзы. Мнацакан Аракелян верамъя, дышетскон ар бырытозь ог 10-12 занятие гинэ кылиз на. Со занятиос Калыкъёслэн эшъяськон юртазы но армян черкын астэ ачид нимаз висъян бырем бере ӝог режимын ортчозы.

«Одӥг гинэ секыт юан вань — армян геноцидлы сӥзем ужрад. Трос муртлы люкаськыны уг яра шуыса вераськимы. Кинлэн ке сяська понэмез потэ ке — котьку но лыктыны буйгатэ. Но туэ валче ум люкаське»,

– таӵе йылпумъянъёс лэсьтӥз «Урарту» огазеяськонлэн тӧроез.