Удмурт кыллэсь нуналзэ пусъёзы Россиын, Венгриын, Словакиын
«Та дыре удмурт кыл понна валтӥсез – солэсь интызэ калыкын юнматон, солэсь кутӥськемзэ паськытатон, элькунлэн кун кылэзлэсь сямен инлыксэ быдэстон», — Артём Малых, МУШ группаысь азьветлӥсь.
Ужрадъёс 20-тӥ шуркынмонэ ик кутскизы ини. Кылчи но кык кыло нылпилэн анаез Юлия Спешилова кыккылолыкъем пиналъёсты будэтон сярысь онлайн-семинар ортчытоз. Докладэз удмурт кылын луоз. Семинаез радъясь – Финн-угор егитъёслэн ассоциацизы (МАФУН).
Ижкарын удмурт кылъя курсъёсты радъясьёс туспуктэмъёсъя вожвылъяськон ялӥзы: пыриськисьёс Удмуртиысь каръёсысь но ёросъёсысь мер интыосын удмурт кылын гожтэмъёсты туспуктыны но нимысьтыз хештегъёсын (#деньудмуртскогоязыка #удмурткыллэннуналыз #укн) мерлыко вотэсъёсы поттыны дэмлало. Озьы адӟиськоз, кызьы кутӥське улосвыламы удмурт кыл.
26-тӥ шуркынмонэ «Кенеш» журнал «Туала удмурт литература: шедьтонъёс но ыштонъёс» котырес ӝӧк ортчытоз.
Егитъёслэн «Шунды» огазеяськонзы Йӧскалык политикая министерствоен но Ижкарысь Калыкъёслэн эшъяськон юртэнызы валче удмурт кылъя тодматскон урокъёс радъялозы.
Венгриысь Сегед университетысь финн-угор кылтодонъя кафедраын Удмурт кыллэн нуналэзлы сӥзем ӝыт ортчоз. Венгриысь кылчиос но удмуртъёс Ашальчи Окилэсь кылбуръёссэ лыдӟозы но сэрттозы-пертчозы, со сярысь документальной фильм учкозы но кырӟалозы-эктозы.
27-тӥ шуркынмонэ «Лудорвай» музейлэн Ижкарысь выль залаз «Юмок» театр студия «Алнаш зомби» пьесаез лыдӟон ортчытоз.
Москваысь ужрадын Литературая Горький нимо институтысь доцент Вера Пантелеева 20-тӥ даурысь удмурт литературалэн сюресэз сярысь вералоз. Озьы ик ужрадын удмурт кылбуръёсты лыдӟозы. Куноосты палэзьлэсь но шулэсь удмурт коктейльёсын куноятозы.
Глазкарысь дышетӥсьёсты дасянъя институтын педагогика тодосъя кандидатлэн Ольга Никифововалэн «Зарождение и становление удмуртской драматургии» лекциез ортчоз.
Сарапулын «Электрон» лулчеберет дворецын удмурт кыл сярысь эссеосъя конкурс, удмурт литературая викторина ортчозы, люкаськемъёсты «Вуюись» фольклор ансамбль шулдыртоз.