Туризм, спорт, шутэтскон: Ижкарлэн но Пичи Пургалэн тӧрооссы валче ужан сярысь тупанкылэз кинюртӥзы

Тупанкыл улсын нимысьтыз саклык висъяськоз ужъя туризмез азинтонлы, физкультура но спорт, гужем шутэтсконэз радъян, быдэ вуымтэосты но егитъёсты уже интыян удысъёсын валче ужанлы.

«Нырысьсэ Удмуртилэн историяз кык муниципал кылдытэтъёслэн валче ужамзы сярысь тупанкыл кинюртэмын. Оскисько, одӥг команда сямен ужаломы, мерлык удысын, экономика но коньдон ужпумъёсъя ужаломы, творчествоя коллективъёсын вошъяськомы. Оскисько, ог-огмылэсь вань марлы дышетскыны», — шуиз Олег Бекмеметьев, Ижкарлэн тӧроез.

Озьы ик со Пичи Пурга ёрослэсь нуналъёссэ Ижкарын ортчытон пумысен ӵектонлы шумпотыса вазиськизы шуыса пусйиз.

«Пичи Пурга ёросэз, солэн интыяськемзъя, Удмуртилэн шоркараз капкаен ниманы луэ. Тросэз Ижкарын улӥсьёс – Пичи Пурга ёросын вордскемъёс. Милемлы вань ӧръёсъя валче ужаны кулэ. Ӵош ужан азинлыко но кыкмылы ик пайдалыко луоз шуыса оскисько», — вераз Сергей Юрин, Пичи Пурга ёрослэн тӧроез.

Муниципал кылдытэтъёс гурт возёсын поттэм ваньбуръя вузпӧрез паськытатонлы умой луонлыкъёс кылдытыны, покчи но шоръёзо ужбергатонэз азинтонлы, мерлык ужпумъёсты быдэстӥсь коммерци луисьтэм огазеяськонъёслы юрттыны, ӟечлэсьтӥсьёслы дурбасьтыны, инноваци но инвестици политикаез быдэстон ужпумъёсъя ужан амалъёсын люкиськыны вераськизы.

Тодэ вайытом, 19-тӥ шуркынмонысен 8-тӥ толсурозь Ижкарын Пичи Пурга ёрослэн нуналъёсыз ортчозы.

https://udmurt.media/udm/news/obshchestvo/70377/