Удмуртъёсты дунъязы Эстониын

Наукаез азинтӥсьёс пӧлын Николай Анисимовлэн «Диалог миров» в матрице коммуникативного поведения удмуртов» монографиез адӟем карымон луиз. 2017-тӥ арын со Николайлы философияя но фольклористикая докторлэсь нимзэ басьтыны юрттӥз.

Книгаын пыр-поч эскеремын удмуртъёслэн осконзы, кылсярысь, кызьы удмуртъёс ӵыжы-выжыоссэс вато, буре ваё. Со сяна, жюри синйылтӥз монография пумысь справочникез но: отын вакчияк удмуртъёслэн осконъёссы сярысь гожтэмын.

Та программа улсын ик пусйизы урал кыл группае пырись кылъёсын гожъяськись кылбурчиосты но писательёсты. 14 фин-угор писательёс пӧлысь хант Валентина Соловарез, мордва Геннадий Гребенцовез но удмурт Ирина Самигуловаез бырйизы.

Башкириысь удмурт нылкышнолэсь Ирина Самигуловалэсь «Зангариё пальпотон» кылбур бичетсэ жюри вылӥ дунъяз, узыр кылтӥрлыксэ, удмурт кылын быгатыса гожъяськемзэ пусйиз. 2019-тӥ арын печатлам сборниказ удмурт кылбуръёс ӟуче берыктыса но поттэмын.

Озьы авторлэсь кылбур дуннезэ удмурт кылэз тодӥсьтэмъёслы но валаны капчи.