«Батуев лыдӟонъёс» ортчозы Удмуртиын 24-тӥ коньывуонэ

«Студентъёс, дышетӥсьёс, лулчеберет удысын ужасьёс Эрик Батуевлэсь творческой кылёсбурзэ эскеронъёсынызы, дышетон ужын кутэменызы но вӧлмытэменызы тодматозы. Котькуд вераськись экспертъёсын кылзэмын луоз. Экспертъёс пӧлын филолог-тодосчиос, методист-тодосчиос луозы. Ужъёсынызы тодматонъёс, озьы ик дышетскисьёслэн ужъёссы нимаз бичетэн поттэмын луозы», — вера  Дышетонэз азинтонъя институтысь тьютор практикаосты азинтонъя центрлэн кивалтӥсез Андрей Клементьев.

Ужрад удмурт журналистлэн но кылбурчилэн вордӥськемез дырысен 50 ар тырмонлы сӥземын. Конференцие филологъёс, шаертодосчиос но дышетӥсьёс сяна, удмурт кылэз тодӥсь 8-11 классъёсын дышетскисьёс но пыриськыны быгато. Ужрадлэн валтӥсь темаез – «Журналистлэсь но кылбурчилэсь Эрик Батуевлэсь творческой кылёсбурзэ эскеронын но вӧлмытонын туала амалъёсты кутон». Конференция «Навигатор» тьютор технологиез уже кутыса ортчоз. Солы луыса котькуд пыриськись со нуналэ аслыз нимаз тодон-валан люкан маршрут лэсьтыны быгатоз.

Конференцилэн программаез:

– 9:00 – 10:00 – пыриськисьёсты пусъён;

– 10:00 – 10:30 – конференциез усьтон;

– 10:30 – 11:40 – пленарной сессия;

– 11:40 – 12:30 – нуназеян;

– 12:30 – 14:30 – экспертъёслэн площадкаосъя сессизы;

– 14:30 – 15:00 – конференцилы йылпумъянъёс лэсьтон, конференцилэн берпуметӥ люкетэз.

8-11 классъёсын дышетскисьёс Эрик Батуевлэн творчествоезлы сӥзем ас ужъёсынызы тодматыны быгато. Тужгес усто ужъёсты дипломъёсын но дуно кузьымъёсын пусъёзы.

Пыриськон понна вазиськонъёсты 15-тӥ коньывуонозь tv.mamontova@mail.ru электрон почта пыр куто.