Удмуртъёслэн вашкала гуръёссыя «Чакара» фестиваль туэ Ижкарын ортчоз
Фольклор фестивале Москваысь но Санкт-Петербургысь, Удмуртиысь, Башкортостанысь, Татарстанысь, Пермь Шаерысь, Комиысь Элькунысь, Свердловск, Тюмень, Киров, Томск, Челябинск улосвылъёсысь коллективъёс пыриськозы. Озьы ик Эстониысь ансамбльёсты возьмало.
6-тӥ толсуре ансамбльысь артистъёс этнографи форуме пыриськозы, отын йӧскалык дӥськут кылдытонъя, эктонъя но кырӟанъя мастер-классъёс радъялозы.
7-тӥ толсуре 11 часын Калык творчествоя элькун юртын гала-концерт ортчоз. Соос вашкала кырӟанъёсты, эктонъёсты быдэстозы, гуръёсты шудозы. Озьы ик фестивальын творчествоя но интерактив площадкаос ужалозы.
Тодэ вайытом, «Камсьӧр удмуртъёслэн йӧскалык центрзы» огазеяськон кичӧлтэмъя 2010-тӥ арын кылдытэм «Чакара» фольклор фестиваль нырысетӥ вить аръёссэ Удмуртиын ортчылӥз. Нош 2015-тӥ арысен со пӧртэм интыосын радъяськылэ. Кылем арын коллективъёс Киров улосвылысь Вятские Поляны каре люкаськылӥзы, 2017-тӥ арын Татарстанысь Кукмор карын пумиськылӥзы.