Дэбес ёросын Геннадий Корепанов-Камскийез буре ваизы

Ужрад сӥземын вал удмурт крезьгурчилэн Геннадий Корепанов-Камскийлэн вордскемез дырысен 90 ар тырмонлы.

Фестивальлы кутскон сётизы крезьугрчилэн вордскем палъёсаз — Тыловай черкогуртын. Отын Корепанов-Камскийез буре ваён пул усьтӥзы. Собере Дэбесын конференци ортчиз. Отын крезьгурчилэн удмурт лулчеберетэз азинтонын интыез сярысь вераськизы.

Пусйыны кулэ, «Певец земли удмуртской» ӵектосэз улонэ пыӵатон понна «Байгурезь» бӧляк президент фондысь коньдон утӥз. Со чотын Геннадий Корепанов-Камскийлэн Ижкарысь Пушкинской ульчаысь улэм корказ но крезьугръя элькун колледжлэн юртэз вылын буре ваён пулъёс усьтозы.

«Кайта элькунамы йӧскалык проект улонэ пыӵам улсын выль лулчеберетъя юртъёс пуктылыны кутскозы. Нырысетӥосыз пӧлын списоке пыртэмын Геннадий Корепанов-Камскийлэн  вордӥськем Тыловай гуртысьтыз клуб», — шуиз лулчеберетъя элькун министр Владимир Соловьёв.