Сюмсиын «Узы-боры» фестиваль ортчиз

Ужрад туэ кыкетӥ ползэ радъяськиз ини. Таяз радэ со ёрослэн 90 ар тырмонэзлы сӥзем праздниклы пӧрмиз. Фестивале Сюмсиын улӥсь калык, бускель гуртъёсысь, ёросъёсысь но Ижкарысь куноос вуизы.

Та нуналэ пичиез но, бадӟымез но пӧртэм вожвылъяськонъёсы пыриськыса, синпель кузьымъёс утыны быгатӥз. «Мылкыд карисьёс тужгес усто такмак, нылпиослы тужгес усто емыш костюм, тужгес аспӧртэм лэсьтэм бакча сульдэр вожвылъяськонъёсы пыриськизы. Пыжен, мотоблокен ӵошатскизы», — вера Сюмси ёросысь «Удмурт Кенеш» огазеяськонлэн ёзэтэныз кивалтӥсь Наталья Стрелкова.

Люкаськемъёс понна интерактивной площадкаос но ужазы. Кылсярысь, киужъя, удмурт калык шудонъёсъя мастер-классъёс, удмурт эктонъёс, мунё театр радъямын вал.

Озьы ик фестивальын ярмарка ужаз, емышъёсын но киужъёсын вузкаризы. Татын котькудӥз емышъёслэсь пыжиськемъёсты веръяны быгатӥз.

Наталья Стрелковалэн верамезъя, праздник шулдыр кырӟанъёсын, эктонъёсын но салютэн йылпумъяськиз.