Школаез йылпумъясьёслы туспуктэмъёсын удмурт альбом лэсьтӥзы Татарстанысь Кукмор ёросын

«Мон кемалась ик удмурт лулчеберетмес азинтон бордын ужасько, кырӟан гожъясько «ЭКНЭ» группаенымы, кылбур гожъясько, собере туспуктэм лэсьтӥсько. И собере мон малпай, кызьы ке но мукет сяменгес кулэ асьме лулчеберетмес азьланьтыны, разбавить шуод-а, мар-а. Соку йыре сыӵе малпан шуккиз: таӵе альбом лэсьтыны», — вера альбом лэсьтыны кичӧлтӥсь, туспуктӥсь Эдуард Иванов.

Туспуктӥсьлэн верамезъя, малпанэныз со аслаз вордӥськем Улын гуртысьтыз школае вамыштӥз. Пиналъёс ӵектонэзлы пумит ӧз луэ, соослы тунсыко потӥз. Альбомысь вань туспуктэмъёсты Эдуард Иванов ачиз лэсьтӥз.

«Школае ветлӥ, отын фотографировать кари. Альбомлэн идеяез, оформлениез – ас понназ со пӧрмиз. Ваньзэ, мае ти адӟиськоды, со мынам уже, кызьы быгатӥ, озьы ик мон лэсьтӥ», — шуэ Эдуард Иванов.

Альбом пиналъёслы но, анай-атайёссылы но, дышетӥсьёссылы но туж яраз.

«Анай-атайёссы мыным гожъяло одӥген-одӥген. Одӥгез тани гожтӥз тон, пе, туж тунсыко идея малпад, кемалась таӵе шумпотонмы милям ӧй вал», — шуэ Эдуард Иванов.

https://udmurt.media/udm/news/kultura-i-turizm/58905/