Али вань, ӵуказе но луоз
Удмурт ӝытлэн кутсконаз Ижысь егит удмурт нылкышноос чай юизы, куноосты пӧраськемъёсынызы утялтӥзы. Вераськизы тунсыко юан пумысен: удмурт кышномуртъёсты, пе, ведӥнъёс шуо — вань-а отын зэмлыкез? Ваньзы огкылысь веразы: валантэм кужымзы зэм но вань. Юлия Шахтина дышетӥсь верамъя, удмурт нылкышно трос уг вераськы, но кулэ дыръяз ваньзэ шонер вералоз, визь-кенешен юрттоз — со бордын ик кужмыз. Вера Вахрушева блогер вераз: нылкышноос инкуазен герӟаськемын, сое умой шӧдо, удмуртъёс сям-йылолъёссэс утё. Мария Галеева кылбурчи но дышетӥсь шуиз: адями аслыз оскыны кулэ, соку ваньмыз удалтоз. Синпӧртман (магия) котькытын вань — инкуазьын но, творчествоын но, адями кусыпъёсын но. Удмурт-а тон, ӧвӧл-а, кышномурт-а, пиосмурт-а — кужым котькытысь шедьтыны луоно, утча гинэ.
Ижысь Егитъёслэн информационно-ресурсной центрзылэн (МИРЦ) «Арт-резиденцияз» тулыспалысен ужа удмурт егитъёслэн «Юмок» театрзы. Солэн кылдытӥсез Дарали Лели «Юмок но эшъёс» концерт дасяз. «Юмокысь» нылъёс Ашальчи Окилэн кылбуръёсыныз «Бублиос» спектакль возьматӥзы, таин валче Дарали Лелилэн выль коллекциысьтыз чебер удмурт дэремъёсын шогольяськизы. «Юмокысь» артист Никита Соприн калыкез серекъятӥз, Любовь Ганьковалэсь «Чорыгасьёс» вероссэ лыдӟыса.
Ужрадын кырӟасьёс вал, пӧлазы уно кутскисьёсыз: Ульяна Климкина но Ксения Вахрушева, Shoozymade (Денис Максимов) но Purodima (Дима Волков). Учкисьёслы тодмо Анастасия Иванова но Катерина Кенjали асьсэлэсь ӧръёссэс азинто. Концертэз учкыса, шумпотоно: али удмурт кылын поп но, рэп но, фолк но вань. Аслэсьтыз кырӟанъёссэ быдэстӥз Туръялыс (Дарья Никитина), солы, гитараен шудыса, юрттӥз Кирилл Кириллов. Даша — «Юмокысь» артистка, кырӟанъёссэ быдэстыкуз но, аспӧртэм, бордаз кыскись образ кылдытэ. Сое кылзыса, малпаськод: азямы — вуоно Надежда Уткина.
Концерт бере мылкыд карисьёс «Ӟеч перепеч» ӝӧк выл шудонэн шудӥзы — сое лэсьтӥз «Шунды» огазеяськонлэн «Чукиндэр» проектысьтыз Вадим Крестьянинов.
Удмурт культуралы сӥзем ӝыт шумпоттӥз выль удмурт нимъёсын. Со дыре ик асьсэды возьматыны луонлык соослы кылдытэ кемаласен удмуртлык понна тыршись Дарали Лели. Умой соиз но: учкисьёс пӧлын пичи нылпиосын егит анай-атайёс трос вал. Озьыен, удмурт культура азинске, солэн вуоноез вань.