Россилэн но городлэн нуналаз 2 сюрс матрёшка буямын вал
— Матрёшка со Россилэн, семьялэн, анайлэн пусэз, — вераз акциез одӥгез радъясь, Калык творчествоя юртысь ужась Светлана Мельчукова. — Соин но Россилэн но городлэн нуналаз таӵе ужрад дасяны малпамы.
Тымет дуре вуттэм матрёшкаос, ӟуч калыклэсь дӥсьсэ сяна, Удмуртиын улӥсь пӧртэм выжы калыкъёслэсь дэремъёссэс «мертазы». Радъясьёс дасязы 30 бадӟым матрёшкаос. Фестиваль дыръя возьматэмын вал 10 калыкъёслэн — удмурт, армян, чуваш, бигер, удмурт, немец — дӥсьёссы.
Нылпиос но бадӟымъёс выль сямен учкизы ӟуч культураысь вуэм шудон шоры, эшшо ке, асьсэос буязы но соосты. Фестивалез ортчытӥсьёс Ижкарын улӥсьёсты но куноосты шудонъёсты буян дыръя тодматӥзы асьме дорын улӥсь калыкъёслэн культураенызы, яратоно буёлъёсынызы, веразы соослэн пуштроссы сярысь.
Ужрад улсын ик матрёшкаосты сэрттонъя но бичанъя турнир ортчиз. 7 фигуралэсь пӧрмытэм шудонэз 15 секунд куспын сэрттыса-бичаса, рекорд пуктэмын.
Радъясьёс ижкаръёс пӧнна пӧртэм тунсыко конкурсъёс, шудонъёс, эктонъёс дасязы. Шулдыръяськонэ лыктэмъёс «Шишки, желуди, орехи» шудонэ пыриськизы, «Нюркины песни» коллективен краковяк эктӥзы, фин-угор но немец калыкъёслэн эктонъёсъя мастер-классэ пыриськизы.
Нылпиослы тужгес кельшиз пулэсь, бумагалэсь но басмалэсь матрёшкаосты буяны. Удмурт калык мунё лэсьтыны. Озьы фестиваль чотын Россилэн 2 сюрс пала шорпусъёсыз яркыт буёлъёсын суредамын вал. Ваньзэ-ӧвӧлзэ калык понна 42 мастер-класс ортчытэмын вал.